రాష్ట్రంలో దాహం కేకలు - తాగునీటి కోసం మారణాయుధాలతో కొట్టుకున్న టీడీపీ, వైఎస్సార్సీపీ వర్గీయులు - Water problems in andhra pradesh

Drinking Water Problems in Andhra Pradesh : వేసవిలో తాగునీటి కోసం అధికారులు ఎలాంటి ఏర్పాట్లు చేయకపోవడంతో ప్రజలు తీవ్ర ఇబ్బందులు ఎదుర్కొంటున్నారు. అరకొర నీటితో నెట్టుకొస్తుండగా మరమ్మతుల పేరిట సరఫరా నిలిపివేయడంతో కాకినాడలో మహిళలు ఆగ్రహం వ్యక్తం చేశారు. అనంతలో తాగునీటి సమస్య ఇరువర్గాల మధ్య చిచ్చుపెట్టింది.

Drinking Water Problems in Andhra Pradesh : రాష్ట్రంలో అక్కడక్కడ చిన్నపాటి వర్షాలు పడతున్నా వేసవి తాపం మాత్రం పోలేదు. ఈ వేసవిలో తాగునీటి కోసం పలు జిల్లాల ప్రజలు తీవ్ర ఇబ్బందులు ఎదుర్కొంటున్నారు. ఎండలు, ఉక్కపోతతో జనం అల్లాడుతుంటే తాగునీటి పైపుల లీకేజీ మరమ్మతుల పేరిట నీటిని నిలిపివేయడంతో కాకినాడ ప్రజలు అల్లాడిపోతున్నారు. ఒకటి నుంచి 13వ వార్డు వరకు తాగునీటితో ఇబ్బందిపడుతున్నారు. దీనికి తోడు తాగునీటి పైపు లీకేజీ కావడంతో సమస్య మరింత జఠిలమైంది. మరమ్మతులు చేసేందుకు నీటి సరఫరా నిలిపివేశారు. మూడు రోజులుగా నీరు రాక జనం దాహం కేకలు పెడుతున్నారు. దుమ్మలపేటలో ఒకే ఒక్క ట్యాంకర్ ద్వారా నీటిని సరఫరా చేయడంపై మహిళలు మండిపడుతున్నారు. ట్యాంకర్ వద్ద నీటికోసం మహిళలు ఒక్కసారిగా రావడంతో తోపులాట చోటుచేసుకుంది.

రెండు నెలలుగా నీరు లేక తీవ్ర ఇబ్బందులు : తాగునీటి సమస్య పరిష్కరించాలని కర్నూలు జిల్లా ఆస్పరిలో ప్రజలు ఆందోళనకు దిగారు. రెండు నెలలుగా నీరు లేక ఇబ్బందులు పడుతుంటే అధికారులు పట్టించుకోవడం లేదని ఎంపీడీవో కార్యాలయం ఎదుట ఖాళీ బిందెలతో నిరసన వ్యక్తం చేశారు. ట్యాంకర్ల ద్వారా తాగునీటిని సరఫరా చేసి సమస్య పరిష్కరిస్తామని అధికారులు హామీ ఇవ్వడంతో వారు వెనుదిరిగారు. అనంతపురం జిల్లా D.హీరేహాల్ మండలం సిద్ధాపురం తండాలో తాగునీరు పట్టుకునే శుద్ధజల ప్లాంటు వద్ద చెలరేగిన ఘర్షణ పెద్దదై వైఎస్సార్సీపీ, తెలుగుదేశం శ్రేణులు దాడులు చేసుకున్నారు. వైసీపీ నాయకులు తెలుగుదేశం వర్గీయులపై కర్రలు, రాళ్లు, మారణాయుధాలతో దాడి చేశారు. గాయపడిన వారిని బళ్లారి విమ్స్‌కు తరలించి చికిత్స అందిస్తున్నారు.