పాఠశాల పైకప్పు పెచ్చులు ఊడిపడి విద్యార్థులకు గాయాలు - ఎమ్మెల్సీ రామచంద్రారెడ్డిపై కేసు - Class Room Roof Fell Down in Kadapa

Class Room Roof Fell Down in Kadapa : కడపలోని వైఎస్సార్సీపీ ఎమ్మెల్సీ రామచంద్రారెడ్డికి చెందిన సాయిబాబా పాఠశాలలో, తరగతి గదుల నిర్మాణాలు నిబంధనలకు విరుద్ధంగా చేపడుతున్నారని గతనెలలోనే టీడీపీ నేతలు ఫిర్యాదు చేశారు. అయినా జిల్లా విద్యాశాఖాధికారులు నిర్లక్ష్యం వహించారు. దాని ఫలితమే మంగళవారం అదే పాఠశాల పైకప్పు పెచ్చులూడిపడటంతో నలుగురు విద్యార్థులు తీవ్రంగా గాయపడ్డారు. ఇందులో ఇద్దరి పరిస్థితి ఆందోళనకరంగా ఉంది. దీనిపై తక్షణమే యాజమాన్యంపై చర్యలు తీసుకోవాలని విద్యార్థి సంఘాలు డిమాండు చేశాయి. మరోవైపు విద్యాశాఖ మంత్రి లోకేశ్ ఆదేశాలతో వైఎస్సార్సీపీ ఎమ్మెల్సీ రామచంద్రారెడ్డిపై పోలీసులు కేసు నమోదు చేసి దర్యాప్తు చేపట్టారు.

Students Injured Ceiling Collapse in Kadapa : కడపలోని అక్కాయపల్లిలో వైఎస్సార్సీపీ ఉపాధ్యాయ ఎమ్మెల్సీ రామచంద్రారెడ్డి సాయిబాబా హైస్కూల్ నిర్వహిస్తున్నారు. పాఠశాల తరగతి గదుల ఆధునికీకరణ పేరుతో నిర్మాణాలు చేపడుతున్నారు. నిబంధనలకు విరుద్ధంగా పనులు జరుగుతున్నాయని గత నెల 18న కడప తెలుగుదేశం ఎమ్మెల్యే మాధవీరెడ్డి, ఎమ్మెల్సీ రాంగోపాల్​రెడ్డి జిల్లా విద్యాశాఖాధికారికి, కమిషనర్​కు లిఖితపూర్వకంగా ఫిర్యాదు చేశారు. కానీ చర్యలు మాత్రం శూన్యం.

ఫలితంగా మంగళవారం నిర్మాణంలో ఉన్న తరగతి గది పైకప్పు పెచ్చులు ఊడిపడటంతో 8వ తరగతి విద్యార్థులకు తీవ్రగాయాలయ్యాయి. ఈ ఘటనలో నలుగురు తీవ్రంగా గాయపడ్డారు. వారిని స్థానికంగా ప్రైవేట్ ఆసుపత్రికి తరలించి చికిత్స అందించారు. వారిలో ఇద్దరి పరిస్థితి ఆందోళనకరంగా ఉందని వైద్యులు చెబుతున్నారు. ఓ విద్యార్థి సిటీ స్కాన్‌లో మెదడులో రక్తం గడ్డ కట్టి ఉంటుందనే అనుమానాలు వ్యక్తం చేస్తున్నారు. మరో విద్యార్థి చేయి విరిగింది.

Kadapa Students Injured in Roof Fell Down : మంగళవారం మధ్యాహ్నం 2 గంటలకు ఘటన జరిగితే యాజమాన్యం తల్లిదండ్రులకు సమాచారం ఇవ్వకుండా, నేరుగా ఆసుపత్రికి తీసుకెళ్లి వారిని ఇంటివద్ద వదిలేశారు. విషయం మీడియాలో రావడంతో పెద్ద ఎత్తున విద్యార్థి సంఘం నాయకులు పాఠశాలకు చేరుకుని ఆందోళన చేపట్టారు. తక్షణం ఎమ్మెల్సీ రామచంద్రారెడ్డిపై కేసు నమోదు చేయాలని డిమాండ్ చేశారు. ఈ ఘటనపై మంత్రి నారా లోకేశ్​ స్పందించడంతో జిల్లా అధికారులు అప్రమత్తమయ్యారు.