బ్యాంకు ఖాతా ఉంటే రూ.4లక్షలు - కేంద్ర ప్రభుత్వ పథకం

20 రూపాయలతో రూ.2 లక్షల బీమా - రూ.450-500తో మరో 2 లక్షలు

Two lakh insurance for 20 rupees : చిన్నపాటి నిర్లక్ష్యం పెద్ద నష్టాన్ని కలిగిస్తుందని ఎన్నో సందర్భాల్లో ఎంతో మందికి అనుభవపూర్వకంగా తెలిసే ఉంటుంది. సరిగ్గా అలాంటిదే ఈ విషయం కూడా. బ్యాంకులో పొదుపు (Saving Account) ఖాతా ఉన్నవాళ్లకి రెండు జీవిత బీమా పథకాలు వర్తిస్తాయనే విషయం ఎక్కువ మందికి తెలియదు. కానీ, కేంద్ర ప్రభుత్వం రెండు రకాల సామాజిక భద్రత జీవిత బీమా పథకాలు అమలు చేస్తోంది. ఈ విషయంలో అవగాహన లేమి కారణంగా పేదలు లబ్ధి పొందలేకపోతున్నారు. ఏదైనా జాతీయ బ్యాంకుల్లో సేవింగ్ ఖాతా ఉన్న ప్రతి వినియోగదారుడి నుంచి 'ప్రధానమంత్రి సురక్ష బీమా యోజన’ (PMSBY) కింద కేవలం రూ.20 ప్రీమియంతో రూ.2 లక్షల విలువైన జీవితబీమా కల్పిస్తున్నారు. ఏదైనా ప్రమాదం జరిగి ఖాతాదారుడు మరణిస్తే బ్యాంకులు రూ.2 లక్షల జీవిత బీమా పరిహారం చెల్లిస్తాయి. అయితే, బ్యాంకులో ఖాతా ఉన్న అందరికీ వర్తించదు. ఏడాదికోసారి రూ.20ని తన ఖాతా నుంచి మినహాయించుకోవాలని ఖాతాదారుడు బ్యాంకుకు రాతపూర్వకంగా సంతకం చేసి విజ్ఞప్తి చేస్తేనే వర్తిస్తుంది. కొన్ని బ్యాంకులు ఈ లేఖను ప్రతి సంవత్సరం తీసుకుంటున్నాయి. ఒక వేళ ఏదైనా సంవత్సరంలో ఆ లేఖ ఇవ్వడం మరిచిపోతే ప్రీమియం మినహాయింపు, బీమా నిలిచిపోతున్నాయి. అందుకే ఆటో డెబిట్‌ (Auto Debit) పేరుతో ఏటా ప్రీమియం సొమ్మును మినహాయించుకుంటున్నాయి. దీనివల్ల ఏటా ఖాతాదారుడు ఏటా లేఖ ఇవ్వాల్సిన అవసరం రాదు.

జీవనజ్యోతికి ప్రీమియం ఎక్కువని

ఖాతాదారు సహజంగా లేదా అనారోగ్యం, ప్రమాద కారణాలతో మరణిస్తే 2 లక్షల రూపాయలు పరిహారంగా ఇచ్చేందుకు ‘ప్రధాన మంత్రి జీవన్‌జ్యోతి బీమా యోజన’ (PMJJBY) ను కూడా కేంద్రం అమలు చేస్తోంది. ఈ పథకంలో ప్రతి సంవత్సరం రూ.450 నుంచి రూ.500 వరకూ (బ్యాంకుల ఆధారం) ఉండడంతో ఎక్కువ మంది ఆసక్తి చూపడం లేదు.

ప్రచారంపై బ్యాంకుల నిర్లక్ష్యం

నిరుపేదలు, దిగువ మధ్య తరగతి కుటుంబ పెద్ద ఏదైనా కారణంతో మరణిస్తే ఆ కుటుంబాలు ఆర్థికంగా తీవ్ర ఇబ్బందులు పడుతున్నాయి. ఈ నేపథ్యంలో వారిపై ఆధారపడిన వారికి సామాజిక ఆర్థిక భద్రత కల్పించేందుకు ఈ రెండు పథకాలను కచ్చితంగా అమలు చేయాలని కేంద్రం గతంలోనే బ్యాంకులకు స్పష్టం చేసింది. వీటితో పాటు అటల్‌ పింఛన్‌ యోజనపైనా విస్తృత ప్రచారం చేయాలని ఆదేశిస్తూ జీవిత బీమా పరిహారం రెండు పథకాల నుంచి రూ.4 లక్షలు చెల్లించాలని స్పష్టం చేసింది. జీరో బ్యాలెన్స్‌తో జన్‌ధన్‌ యోజన బ్యాంకు ఖాతాదారులకు అవగాహన కల్పించి ప్రీమియం వసూలు చేయాలని కేంద్రం సూచించినా కొన్ని బ్యాంకులు నిర్లక్ష్యం వహిస్తున్నాయి.