AP Pensioners Association Round Table Meeting: ఏపీ పునర్నిర్మాణం కోసం ఉపాధ్యాయులు, పెన్షనర్లకు ఆర్థికపరంగా అన్యాయం చేసిన వైసీపీ ప్రభుత్వానికి తగిన బుద్ధి చెప్పాల్సిందేనని అసోసియేషన్ ఫర్‌ ఏపీ పెన్షనర్స్ సెటిల్డ్ ఎట్ హైదరాబాద్ ప్రధాన కార్యదర్శి టీఎంబీ బుచ్చిరాజు అన్నారు. ఇంత అన్యాయం చేసిన జగన్ ప్రభుత్వం మళ్లీ మనకు కావాలా అని ప్రశ్నించారు. హైదారాబాద్ సోమాజిగూడ ప్రెస్‌క్లబ్‌లో ఆంధ్రప్రదేశ్‌ పెన్షనర్ల సమస్యలు - పరిష్కార మార్గాలు అనే అంశంపై ఏర్పాటు చేసిన రౌండ్ టేబుల్ సమావేశంలో ఆయన ముఖ్య అతిధిగా పాల్గొన్నారు.
అసోసియేషన్ ఫర్‌ ఏపీ పెన్షనర్స్ అధ్యక్షుడు కె. నళినీ మోహన్‌కుమార్ అధ్యక్షన జరిగిన ఈ కార్యక్రమానికి అఖిల భారత రాష్ట్ర పెన్షనర్స్ సమాఖ్య మాజీ కార్యదర్శి జి. పూర్ణచంద్రరావు, ప్రధాన కార్యదర్శి డి. సుధాకర్, ఏపీ రాష్ట్ర ప్రభుత్వ ఎంప్లాయిస్ అసోసియేషన్ మాజీ ప్రధాన కార్యదర్శి నాగరాజు తదితరులు హాజరయ్యారు.
2019లో మారిన రాజకీయ పరిణామాల నేపథ్యంలో పెన్షనర్లంతా సంక్షోభం ఎదుర్కొంటున్నామని బుచ్చిరాజు ఆందోళన వ్యక్తం చేశారు. 2014- 2019 మధ్య కాలంలో పెన్షన్ ఎలాంటి ఆటంకాలు లేకుండా వచ్చిందని అన్నారు. అప్పుడు రాష్ట్ర విభజన జరిగినప్పటికీ రాష్ట్రంలో నెలకొన్న ఆర్థిక లోటు లెక్క చేయకుండా అప్పటి ముఖ్యమంత్రి చంద్రబాబు ప్రభుత్వం 43 శాతం ఫిట్మెంట్లో 10వ పీఆర్సీ ఇచ్చిందని తెలిపారు. 2014 జూన్ నుంచి 2015 మార్చి వరకు 10 నెలల పీఆర్సీ, ఆరియర్స్ సుమారు 2 వేల కోట్ల రూపాయలు టీడీపీ ప్రభుత్వం ఒకేసారి పెన్షనర్లందరికీ చెల్లించిందని బుచ్చిరాజు గుర్తు చేశారు.
'ఇదేంది రాంబాబూ?' - లాటరీ కోసం పింఛన్దారుల సొమ్ము స్వాహా
2019- 2024 మధ్య కాలంలో వైసీపీ ప్రభుత్వం వచ్చాక పెన్షనర్ల పరిస్థితి దారుణంగా తయారయ్యిందని బుచ్చిరాజు ఆగ్రహం వ్యక్తం చేశారు. ఒకటో తేదీన పెన్షన్ రాక ఇబ్బందులకు గురవుతున్నామని అన్నారు. 10 నుంచి 20వ తేదీ వరకు ఎదురు చూస్తూ పెన్షన్ వస్తే చాలు అనే స్థాయికి వచ్చామని ఆక్షేపించారు. గతంలో ఏ ప్రభుత్వం కూడా ఉద్యోగులు, పెన్షనర్లకు అన్యాయం చేయలేదని ధ్వజమెత్తారు. ఈ నేపథ్యంలో గత నాలుగేళ్లుగా సమస్యలు పరిష్కరించాలంటూ ప్రభుత్వానికి ఎన్ని సార్లు విన్నవించినా పట్టించుకోలేదని ఆవేదన వ్యక్తం చేశారు.
విపక్ష నేతలను సంప్రదించి డిమాండ్లు ప్రస్తావించగా అధికారంలోకి వచ్చిన తర్వాత పరిష్కరిస్తామని హామీ ఇవ్వడం సంతోషకరమని అన్నారు. రాబోయే ఎన్నికల్లో మనకు మేలు చేస్తామని హామీ ఇచ్చిన రాజకీయ పార్టీని బలపరిచి గెలిపించే అంశంపై చిత్తశుద్ధితో ఆలోచించాలని కోరారు. ఈ ప్రభుత్వం వల్ల ఇబ్బందులు పడ్డ ప్రతి ఒక్కరూ తమ ఓటు సద్వినియోగం చేసుకోవాలన్నారు. పెన్షనర్లుగా మన ప్రయోజనాల సంరక్షణ, సమాజ శ్రేయస్సు కోసం సార్వత్రిక ఎన్నికల వేళ కంకణ బద్ధులమవుదామని బుచ్చిరాజు పిలుపునిచ్చారు.
