ఇక వారికి దబిడిదిబిడే - ఏపీలో 'ఈగల్' ఏర్పాటు చేస్తూ ప్రభుత్వ ఉత్తర్వులు

డ్రగ్స్‌ నియంత్రణకు ఈగల్‌ను ఏర్పాటు చేస్తూ ప్రభుత్వం ఉత్తర్వులు

Eagle Task Force in AP : రాష్ట్రంలో గంజాయి, డ్రగ్స్ నియంత్రణ కోసం 'ఎలైట్ యాంటీ నార్కోటిక్స్ గ్రూప్ ఫర్ లా ఎన్​ఫోర్స్​మెంట్ (ఈగల్ )ను' ఏర్పాటు చేస్తూ ప్రభుత్వం ఉత్తర్వులు జారీ చేసింది. రాజధాని అమరావతిలో కేంద్ర కార్యాలయం, జిల్లాల్లో యూనిట్ కార్యాలయాలను ఏర్పాటు చేస్తూ ఉత్తర్వులిచ్చింది. ఇందులో అమరావతిలో నార్కోటిక్ పోలీస్​స్టేషన్, 26 జిల్లాల్లో డిస్ట్రిక్ట్ నార్కోటిక్ సెల్స్ ఉన్నాయి.

గంజాయి, మత్తు పదార్థాల సరఫరా, రవాణా నియంత్రణ, నేరాల దర్యాప్తు, విచారణపై ఈగల్ ఫోర్స్​ కార్యాచరణ చేపట్టనుంది. ఇందులో పనిచేసే సిబ్బందిని డిప్యూటేషన్​పై తీసుకోవాలని ప్రభుత్వం ఉత్తర్వుల్లో తెలిపింది. ఇందులో చేరిన యూనిఫాం సర్వీసు ఉద్యోగులకు 30 శాతం ప్రత్యేక అలవెన్స్​ ఇవ్వనున్నట్టు వివరించింది. గంజాయి, డ్రగ్స్ వ్యవహారాల్లో విచారణకు 5 ప్రత్యేక ఫాస్ట్​ట్రాక్ కోర్టులను ఏర్పాటు చేయాలని నిర్ణయం తీసుకున్నట్లు పేర్కొంది. ఇందులో భాగంగా విశాఖ, రాజమహేంద్రవరం, విజయవాడ, గుంటూరు, తిరుపతిలో ఫాస్ట్​ట్రాక్ కోర్టుల ఏర్పాటుకు సంబంధించి హైకోర్టుకు నివేదించామని వెల్లడించింది. ఈగల్ ఫోర్స్​కు ముందుగా రూ.8.59 కోట్లు కేటాయిస్తూ హోంశాఖ ముఖ్యకార్యదర్శి కుమార్ విశ్వజిత్ ఆదేశాలు జారీ చేశారు.

డ్రగ్స్​ నెట్​వర్క్​ని ధ్వంసం చేసేలా కార్యాచరణ : గంజాయి సాగు, ఉత్పత్తి, రవాణా, స్మగ్లింగ్, విక్రయం, కొనుగోలు, సేవనం లాంటి అంశాల్లో కఠినంగా వ్యవహరించేలా దీనికి ప్రత్యేకంగా బాధ్యతల్ని అప్పగిస్తూ హోంశాఖ ఉత్తర్వులు ఇచ్చింది. దీంతో పాటు రాష్ట్రంలో మత్తు పదార్థాలు, సింథటిక్ డ్రగ్స్ స్మగ్లింగ్​ను ఉక్కుపాదంతో అణచివేయాలని ఆదేశించింది. ఏపీలో ప్రజారోగ్యాన్ని కాపాడేలా మాదకద్రవ్యాల నెట్​వర్క్​ని ధ్వంసం చేసేలా కార్యాచరణ, దర్యాప్తు ఉండాలని ఈగల్​కి ప్రభుత్వం ఆదేశాలిచ్చింది. గతంలో సీఐడీ నార్కోటిక్స్ సెల్ ఆధీనంలో ఉన్న ఈ అధికారాలను వీటికి అప్పగిస్తూ ఉత్తర్వులు జారీ చేసింది.

AP EAGLE to Fight Drugs : అదనపు డీజీ లేదా ఐజీ స్థాయి నేతృత్వంలో ఈగల్​ పనిచేయనుంది. ఒక ఎస్పీ, అదనపు ఎస్పీలు, డీఎస్పీలతో పాటు 459 మంది సిబ్బందిని కేటాయిస్తున్నట్లు ప్రభుత్వం తెలిపింది. మరోవైపు స్థానిక పోలీసులతో కలిసి రాష్ట్రంలో గంజాయి, డ్రగ్స్ కేసుల్ని నమోదు చేయడంతో పాటు దర్యాప్తు కూడా ఈగల్ ఫోర్స్​ చేస్తుందని వెల్లడించింది. ఈ ఫోర్స్​కి నేతృత్వం వహించే అధికారి నార్కోటిక్స్ కోఆర్డినేషన్ సెంటర్​కి అధిపతిగా ఉంటారని వివరించింది.

రాష్ట్రవ్యాప్తంగా పోలీసు కమిషనర్లు, ఎస్పీలు, జీఆర్పీ, ఇతర పోలీసు యూనిట్లు ఈగల్ టాస్క్​ఫోర్స్​కు కేసుల నమోదు, దర్యాప్తులో సహకరించాలని స్పష్టం చేసింది. ప్రభుత్వ అనుమతితో దేశంలో ఎక్కడికైనా వెళ్లి కేసు దర్యాప్తు చేసేందుకు అవకాశం కల్పించింది. అమరావతిలో 66 మందితో రాష్ట్రస్థాయి టాస్క్​ఫోర్స్​, విశాఖ, పాడేరులో​ డీఎస్పీ స్థాయి అధికారులను నియమించనున్నట్టు తెలిపింది. దీంతో పాటు 24 గంటలూ పనిచేసే సెంట్రల్ కంట్రోల్ రూమ్ కూడా ఈగల్ కేంద్ర కార్యాలయంలో ఏర్పాటు చేస్తామని వివరించింది. అలాగే ప్రజలు సమాచారం, ఫిర్యాదులు చేసేందుకు 1972 కాల్​సెంటర్ పనిచేస్తుందని ప్రభుత్వం వెల్లడించింది.