విద్యార్థులకు గుడ్ న్యూస్ - ఖాతాల్లోకి డబ్బులు వేస్తామన్న ప్రభుత్వం

మంత్రి లోకేశ్ విజ్ఞప్తి - ఫీజు రీయింబర్స్​మెంట్ నిధుల విడుదలకు ప్రభుత్వం గ్రీన్ సిగ్నల్

FEE REIMBURSEMENT SCHEME : రాష్ట్రవ్యాప్తంగా అన్ని కళాశాలల యాజమాన్యాలకు ప్రభుత్వం ఫీజు రీయింబర్స్​మెంట్ నిధులు చెల్లించనుంది. విద్యాశాఖ మంత్రి నారా లోకేశ్‌ విజ్ఞప్తి మేరకు ప్రభుత్వం ఈ నిర్ణయం తీసుకుంది. యాజమాన్యాలకు భరోసా కల్పించేలా ముందస్తుగా కొంత మొత్తం విడుదల చేయాలని ఇటీవల జరిగిన క్యాబినెట్ సమావేశం నిర్ణయించింది. ఫీజు చెల్లింపుల నేపథ్యంలో విద్యార్థుల్ని ఇబ్బంది పెట్టకుండా చూడాల్సిందిగా కలెక్టర్లకు ముఖ్యమంత్రి నారా చంద్రబాబునాయుడు సూచించారు.

వైఎస్సార్సీపీ ప్రభుత్వం ఫీజు రీయింబర్స్​మెంట్ బిల్లులు బకాయి పెట్టడంతో విద్యార్థులు తీవ్ర ఇబ్బందులు పడ్డారు. ఈ నేపథ్యంలో తాము అధికారంలోకి వస్తే ఫీజు రీయింబర్స్​మెంట్ చెల్లిస్తామని టీడీపీ అధినేత చంద్రబాబు హామీ ఇచ్చారు. ఆ మేరకు తాజాగా మంత్రి మండలి సమావేశంలోనూ చర్చించగా విద్యాశాఖ మంత్రి లోకేశ్ సూచనతో ప్రభుత్వం స్పందించింది. కళాశాలల యాజమాన్యాలు విద్యార్థులను ఇబ్బంది పెట్టకుండా చూసుకోవాలని, వారికి భరోసా కల్పించేలా ముందుగా కొన్ని నిధులు విడుదల చేయాలని ముఖ్యమంత్రి ఆదేశించారు.

ఇదిలా ఉండగా తమ హయాంలో పెండింగ్ బిల్లులపై వైఎస్సార్సీపీ నేతలు ఆందోళనకు పూనుకోవడం గమనార్హం. రాష్ట్ర వ్యాప్త ఆందోళనలకు ఆ పార్టీ పిలుపునివ్వడంతో విమర్శలు వచ్చాయి. క్యాబినెట్ సమావేశంలో మంత్రి లోకేశ్ ఇదే విషయాన్ని ప్రస్తావిస్తూ వేలాదిమంది విద్యార్థులు ఫీజు రీయింబర్స్​మెంట్ డబ్బుల కోసం ఎదురుచూస్తున్నారని తెలిపారు. నిధుల విడుదలకు ఆమోదం తెలపాలని కోరగా సీఎం వెంటనే స్పందిస్తూ ప్రాధాన్యతా క్రమంలో విడుదల చేయాలని సూచించారు. అయితే అవి గత ప్రభుత్వం తెచ్చిన తల్లుల ఖాతాల్లోకి, జాయింట్ ఖాతాల్లోకి కాకుండా గతంలో టీడీపీ ప్రభుత్వం అమలు చేసిన విధంగా విద్యార్థుల (యాజమాన్య) ఖాతాల్లోకి నమోదు చేయాలని స్పష్టం చేశారు.

సర్టిఫికెట్ల జారీలో తొలగనున్న ఇబ్బందులు

గత ప్రభుత్వం చేసిన తప్పిదాలను సరిదిద్దుతున్నామని చెప్పిన సీఎం చంద్రబాబు.. కళాశాలల యాజమాన్యాల నుంచి విద్యార్థులకు ఇబ్బందులు లేకుండా చూడాలని కలెక్టర్లను ఆదేశించారు. విడతల వారీగా నిధులు చెల్లిస్తే యాజమాన్యాలకు సైతం ఆర్థిక భారం తగ్గుతుందని, ప్రభుత్వం ఆ భరోసా కల్పిస్తుందని పేర్కొన్నారు. ఇదిలా ఉండగా విద్యార్థుల సర్టిఫికెట్ల జారీ ప్రక్రియలోనూ ఎదురవుతున్న సమస్యలపై దృష్టి సారించాలని సూచించారు. విద్యాశాఖ మంత్రి నారా లోకేశ్ అభ్యర్థన మేరకు నిధుల విడుదల ఆమోదం తెలుపుతున్నట్లు ప్రకటించారు.

స్పష్టం చేసిన మంత్రి డోలా

సాంఘిక సంక్షేమ శాఖ మంత్రి డోలా బాలవీరాంజనేయస్వామి శాసనమండలిలో మాట్లాడుతూ ఫీజు రీయింబర్స్‌మెంట్‌ పథకాన్ని కూటమి ప్రభుత్వం కొనసాగిస్తుందని స్పష్టం చేశారు. ఇకపై కళాశాల యాజమాన్యాల ఖాతాలకే ఫీజు చెల్లింపులు ఉంటాయని స్పష్టం చేశారు. వైఎస్సార్సీపీ ప్రభుత్వం ఫీజులు చెల్లించకుండా ఎగ్గొట్టిందని, తల్లి ఖాతాలో, ఆ తర్వాత తల్లి-విద్యార్థి జాయింట్‌ ఖాతాలో నగదు జమ చేయడం వల్ల అవస్థలు పడ్డారని గుర్తు చేశారు. ఇకపై ఆ విధానానికి స్వస్తి పలికి గతంలో మాదిరిగా విడతల వారీగా ఫీజు బకాయిలు కళాశాలల యాజమాన్య ఖాతాల్లో జమచేస్తామన్నారు.