How to Make Poornam Boorelu : చాలా మంది ఇంట్లో పూజలు చేసినప్పుడు దేవుడికి నైవేద్యంగా పూర్ణం బూరెలు సమర్పిస్తుంటారు. ఇంకా పండగలు, శుభకార్యల సమయంలోనూ వీటిని చేసుకుని ఇష్టంగా తింటుంటారు. అయితే.. సాధారణ సమయాల్లోనూ పిల్లలకు రుచికరంగా వీటిని చేసి పెట్టొచ్చు. కానీ.. అందరికీ పర్ఫెక్ట్గా పూర్ణాలు చేయడం రాదు. కొన్నిసార్లు ట్రై చేసినా.. పూర్ణం బయటకి వచ్చేస్తుంది. అందుకే ఈ టిప్స్ మీకోసం. ఈ స్టోరీలో చెప్పిన కొలతలు పాటిస్తూ చేస్తే పూర్ణం బూరెలు సూపర్గా వస్తాయి. మరి ఇక ఆలస్యం చేయకుండా కమ్మటి పూర్ణం బూరెలు ఎలా చేయాలో ఓ సారి చూడండి..
స్టఫింగ్(పూర్ణం) కోసం :
- శనగపప్పు-కప్పు
- బెల్లం తరుగు-ఒకటిన్నర కప్పు
- నెయ్యి - 2 టేబుల్ స్పూన్లు
- యాలకుల పొడి - పావు టీస్పూన్
- నీరు
కోటింగ్ కోసం :
- మినప్పప్పు- కప్పు
- బియ్యం- ఒకటిన్నర కప్పు
- ఉప్పు - చిటికెడు
- పంచదార - 1 టీస్పూన్
- వాటర్ - ఒకటిన్నర కప్పు
- వంటసోడా - పావు టీస్పూన్
- నూనె - వేయించడానికి తగినంత
తయారీ విధానం :
- ఇందుకోసం ముందుగా ఒక గిన్నెలో మినప్పప్పు, బియ్యం తీసుకుని శుభ్రంగా కడగాలి. ఆపై గిన్నెలో నీళ్లు పోసి మూతపెట్టి.. 5 గంటలు నానబెట్టుకోవాలి.
- ఆ తర్వాత ఈ రెండింటినీ మరోసారి శుభ్రంగా కడగాలి. ఇప్పుడు ఓ మిక్సీ జార్లోకి తీసుకొని చిక్కని దోశపిండిలా గ్రైండ్ చేసుకోవాలి. ఈ పిండిని ఒక మిక్సింగ్ బౌల్లోకి తీసుకోండి.
- బౌల్పై మూతపెట్టి మూడు గంటలు అలా వదిలేయాలి.
- ఇప్పుడు పిండి పులిసేలోపు ఒక గిన్నెలోకి శనగపప్పు తీసుకుని బాగా కడగండి. ఆపై నీళ్లు పోసి గంటపాటు నానబెట్టుకోండి.
- ఇప్పుడు కుక్కర్లో నానబెట్టిన శనగపప్పు, రెండు కప్పుల నీరు పోసుకుని 3 విజిల్స్ వచ్చే వరకు ఉడికించుకోండి.
- తర్వాత పప్పుని జల్లించుకోండి. శనగపప్పు పూర్తిగా చల్లారిన తర్వాత మిక్సీ జార్లో వేసుకుని గ్రైండ్ చేసుకోండి.
- గ్రైండ్ చేసిన శనగపిండిని ఒక పాన్లోకి తీసుకోండి.
- ఇప్పుడు స్టౌపై మరో కడాయి పెట్టుకొని బెల్లం తరుగు, కొన్ని నీళ్లు వేసుకోండి.
- స్టౌను మీడియం ఫ్లేమ్లో ఉంచి బెల్లం పూర్తిగా కరిగించండి. కరిగిన బెల్లం పాకాన్ని గ్రైండ్ చేసుకున్న శనగపిండి పాన్లో వడకట్టుకోండి.
- ఇప్పుడు పాన్ని స్టౌపై పెట్టి కలుపుతూ ఉండాలి. పూర్ణం బాగా గట్టిగా మారే వరకు కలుపుతూ ఉడికించుకోవాలి.
- ఆ విధంగా అయ్యాక యాలకుల పొడి, నెయ్యి వేసుకుని బాగా కలపాలి. ఇప్పుడు స్టౌ ఆఫ్ చేసి మిశ్రమాన్ని పూర్తిగా చల్లార్చుకోవాలి.
- ఇప్పుడు చేతులకు నెయ్యి రాసుకుని పూర్ణం కొద్దిగా తీసుకుని చిన్నచిన్న ఉండల్లా చేసుకోవాలి.
- ఇప్పుడు పులిసిన దోశపిండిలో కొద్దిగా ఉప్పు, చక్కెర, చిటికెడు వంటసోడా వేసి మిక్స్ చేయండి.
- అనంతరం స్టౌపై పాన్ పెట్టుకొని పూర్ణాలు వేయించడానికి సరిపడా వేసుకోవాలి.
- ఆయిల్ వేడయ్యాక.. ముందుగా ప్రిపేర్ చేసుకొని పెట్టుకున్న చిన్న చిన్న ఉండలను ఒక్కొక్కటిగా తీసుకంటూ దోశపిండిలో ముంచి కాగుతున్న నూనెలో వేయాలి.
- పూర్ణం బూరెలను రెండు వైపులా దోరగా వేయించుకుని ఒక ప్లేట్లోకి తీసుకోవాలి. అంతే ఇలా సింపుల్గా చేసుకుంటే లోపల పూర్ణం బయటకు రాకుండా పర్ఫెక్ట్గా వస్తాయి.
- నచ్చితే ఇలా ఓసారి పూర్ణం బూరెలు ట్రై చేయండి.
ఇవి కూడా చదవండి :
'నవరాత్రుల్లో అమ్మవారి సంపూర్ణ అనుగ్రహం పొందడానికి - ఈ నైవేద్యం సమర్పించండి'!
బొజ్జ గణపయ్యకు "ఉండ్రాళ్ల పాయసం" - ఇలా చేసి పెడితే వినాయకుడు ఎంతో ఆనందిస్తాడు!
