சமையல் பொடி குடோனில் தீ விபத்து... 1 லட்சம் மதிப்பிலான பொருட்கள் எரிந்து நாசம்!

கன்னியாகுமரி: நாகர்கோவில் வடசேரி அசம்பு ரோட்டில் சோமசுந்தரம் என்பவருக்கு சொந்தமான சமையல் பொடி குடோன் வடசேரி சாலையில் 2 மாடி கட்டிடத்தில் அமைந்துள்ளது. இந்த குடோனில் திடீரென இரண்டாவது மாடியில் இருந்து கரும்புகை வந்துள்ளது. முதலில் சிறிதாக வந்த புகை சிறிது நேரத்தில் பெரும் புகையாக பரவியுள்ளது. இதனைக் கண்ட அக்கம் பக்கத்தினர் தீயணைப்பு துறையினருக்கு தகவல் கொடுத்துள்ளனர்.  

அந்த தகவல் அறிந்த உடனே சம்பவ இடத்திற்கு விரைந்து வந்த தீயணைப்பு துறையினர் 1 மணி நேரமாக போராடி கடையில் உள்ள கண்ணாடிகளை உடைத்து தீயை கட்டுக்குள் கொண்டு வந்தனர். மேலும் அக்கம் பக்கத்தில் இருந்த கடைகளும் அடைக்கப்பட்டன. தொடர்ந்து, அப்பகுதியில் மின்சாரமும் துண்டிக்கப்பட்டது. சாலையில் வாகனங்கள் செல்லாத படி சாலையின் இருபுறமும் தடுப்புகள் வைத்து போலீசார் அடைத்தனர்.  

தீ விபத்து காரணமாக அசம்பு ரோட்டில் சுமார் ஒரு மணி நேரத்துக்கும் மேலாக போக்குவரத்து துண்டிக்கப்பட்டது. அந்த வழியாக செல்லக்கூடிய வாகனங்கள் அனைத்தும் மாற்றுப்பாதையில் இயக்கப்பட்டன. இதனால் கடும் போக்குவரத்து நெருக்கடி ஏற்பட்டது. 

அதைத் தொடந்து, தீ விபத்து எப்படி நடந்தது என தீயணைப்புத் துறையினரும், காவல்துறையினரும் விசாரணை மேற்கொண்டு வருகின்றனர். இந்த தீ விபத்தில் சுமார் ஒரு லட்சத்திற்கு மேல் மதிப்புள்ள சமையல் பொடிகள் எறிந்து நாசமானது. திடீரென அசம்பு ரோட்டில் 2 மாடி கட்டிடத்தில் தீ விபத்து ஏற்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது.