விருதுநகரில் பசுமை பட்டாசு தயாரிப்பு குறித்த நாக்பூர் நீரி அமைப்பின் சோதனை ஆய்வு மையம் தனியார் கல்லூரியில் திறக்க உள்ள நிலையில், ஆய்வு மையத்தின் செயல்பாடுகள், பசுமை பட்டாசு தயாரிப்பது சம்பந்தமான ஆய்வு கூட்டம் ஆட்சியர் அலுவலகத்தில் தமிழ்நாடு பால்வளத் துறை அமைச்சர் ராஜேந்திர பாலாஜி தலைமையில் இன்று நடைபெற்றது. இதில் நீரி அமைப்பிர் இயக்குநர் ராகேஷ் குமார், மூத்த விஞ்ஞானி சாதனா ராயில் உள்ளிட்டோர் கலந்துகொண்டனர்.
பசுமை பட்டாசு பற்றிய ஆலோசனை கூட்டத்திற்குப் பின் செய்தியாளர்களைச் சந்தித்த ராஜேந்திர பாலாஜி, ’பசுமை பட்டாசு தயாரிப்பு சம்பந்தமான சோதனை தனியார் கல்லூரியில் நடைபெற உள்ளது. பட்டாசில் கலக்கப்படும் பேரியம் நைட்ரேட்டின் அளவை குறைத்து 20 விழுக்காடு மாற்று பொருட்கள் சேர்த்து மாசை குறைத்து பசுமை பட்டாசுகள் தயாரிக்கலாம். அது சம்பந்தமாக உச்ச நீதிமன்றத்தில் மனுத்தாக்கல் செய்யப்பட்டுள்ளது.
அதன் மூலம் பட்டாசு தொழிலுக்கு விடிவுகாலம் வரும். இந்த செய்தி பட்டாசு உற்பத்தியாளர்கள் மத்தியிலும், பட்டாசு தொழிலாளர்கள் மத்தியிலும் பெரும் மகிழ்வை ஏற்படுத்தியுள்ளது. தமிழ்நாடு அரசின் கோரிக்கையை ஏற்று மத்திய அரசின் மூலம் நீரி அமைப்பு நல்ல முடிவை எடுத்ததால் இந்தியாவில் உள்ள 1.5 கோடி பட்டாசு தொழிலாளர்களின் வாழ்வில் ஒளி ஏற்படும் என்ற செய்தி வந்துள்ளது.
தனியார் கல்லூரியில் நடைபெறும் சோதனை முடிந்த பிறகு, மாவட்ட ஆட்சியரிடம் கலந்தாலோசித்து அனைத்து உரிமங்களும் முறையான வழியில் பெற்றபின் பட்டாசு தயாரிக்கலாம். இதற்கு தமிழ்நாடு அரசின் நடவடிக்கையும் மத்திய அரசின் ஒத்துழைப்பும்தான் மிக முக்கிய காரணம்’ என்றார்.
பின்னர் பட்டாசு உற்பத்தியாளர் சங்கத் தலைவர் கணேசன் பேசுகையில், ’பசுமை பட்டாசு தயாரிப்பு முறைக்கு இரண்டு புதிய ஃபார்முலாக்கள் கண்டறியப்பட்டுள்ளன. ஒன்று பேரியம் நைட்ரேட் முற்றிலும் இல்லாத ஃபார்முலா. மற்றொன்று 20% முதல் 30% வரை பேரியம் நைட்ரேட் கொண்டு தயாரிக்கும் முறை. நான்கு மாதகால வேலை நிறுத்தம், மழை போன்ற காரணத்தால் கடந்த ஆண்டைவிட இந்த ஆண்டு பட்டாசு உற்பத்தி குறைவே. இருப்பினும் இந்தாண்டு தீபாவளிக்கு விலை ஏற்றம் இருக்காது.பட்டாசு உற்பத்தி தடையின்றி நடைபெறுவதற்கு தமிழ்நாடு அரசுதான் காரணம்’ என்றார்.
