அமெரிக்காவின் நாசா விண்வெளி ஆராய்ச்சி நிறுவனம் சந்திரனில் காலடிவைத்து 50 ஆண்டுகள் நிறைவடைந்த பொன் விழாவைக் கொண்டாடிவருகிறது. இந்நிலையில் அமெரிக்காவின் நாசா விண்வெளி ஆராய்ச்சி நிறுவனத்தின் முன்னாள் விண்வெளி வீரர் டான் தாமஸ், தென்னிந்தியாவில் உள்ள முக்கிய நகரங்களுக்குச் சென்று தன்னுடைய விண்வெளி அனுபவங்களை பள்ளிக் கல்லூரி மாணவர்களுடன் பகிர்ந்துவருகிறார்.
அந்த வகையில் நேற்று விருதுநகர் மாவட்டம் அருப்புக்கோட்டையிலுள்ள தனியார் கல்லூரியில் நடைபெற்ற நிகழ்ச்சியில், டான் தாமஸ் கலந்துகொண்டு பள்ளி மாணவ, மாணவிகளிடம் கலந்துரையாடினார். இந்த நிகழ்ச்சியில் பள்ளி மாணவ மாணவிகளின் கேள்விகளுக்குப் பதில் அளித்தார். இதில் தன்னுடைய விண்வெளி பயணத்தின்போது ஏற்பட்ட அனுபவங்களையும் கூறினார்.
நிகழ்ச்சியின் முடிவில் செய்தியாளர்களைச் சந்தித்த டான் தாமஸ், “தற்போது இந்தியாவின் விண்வெளி ஆராய்ச்சி நிறுவனமான இஸ்ரோ அனுப்பிய சந்திரயான் 2 விண்கலம், நிலவின் தென் துருவத்தில் தரை இறங்குவது இஸ்ரோவுக்கு மட்டுமின்றி நாசாவிற்கும் உலக விண்வெளி ஆராய்ச்சியாளர்களுக்கும் நன்மைதரும்.
இஸ்ரோவின் சந்திரயான் 2 விண்கலம் நிலவின் தென் துருவத்தில் இறங்குவது இந்தியாவிற்குக் கிடைத்த மிகப்பெரிய வெற்றியாகும். இந்த வெற்றியின் மூலம் சந்திராயன் 2 மூலம் இந்திய மாணவர்களுக்கு விண்வெளி ஆராய்ச்சியில் நல்ல எதிர்காலம் இருக்கிறது.
இந்திய விண்வெளி ஆராய்ச்சியாளர்களுக்கு இஸ்ரோ சிறந்த அளவில் ஊக்கமும் பயிற்சியும் அளித்துவருகிறது. எதிர்காலத்தில் நிலவு மட்டுமின்றி செவ்வாய் குறித்து ஆராய்ச்சி செய்யவும் இந்திய மாணவர்களுக்கு எதிர்காலத்தில் அதிக அளவில் வாய்ப்புள்ளது” என்று கூறினார்.
