விருதுநகர் ஒன்றியத்திற்கு உட்பட்ட மெட்டுகுண்டு ஊராட்சியில் மொத்தம் ஒன்பது வார்டுகள் உள்ளன. இதில் 9ஆவது வார்டில் உள்ளாட்சித் தேர்தலில் போட்டியிட்ட மாரிமுத்து என்பவர் வெற்றி பெற்றுள்ளார். இதற்கான சான்றிதழைக் கடந்த மாதம் 2ஆம் தேதி தேர்தல் நடத்தும் அலுவலரே மாரிமுத்துவிடம் வழங்கியுள்ளதாகக் கூறப்படுகிறது.
இதையொட்டி கடந்த மாதம் 11ஆம் தேதியன்று பதவியேற்க ஊராட்சி அலுவலகம் வந்திருந்த மாரிமுத்துவை தேர்தல் அலுவலர்கள் பதவியேற்க விடாமல் தடுத்துள்ளனர். இதையடுத்து இன்று வரை அந்த வார்டு உறுப்பினர் பதவியை ஏற்கவிடாமல் அலைக்கழித்து வந்துள்ளனர். இதனால் நம்பிக்கையிழந்த மாரிமுத்து விருதுநகர் மாவட்ட ஆட்சியரிடம் இன்று கோரிக்கை மனு ஒன்றை அளித்துள்ளார்.
அந்த மனுவில், “9ஆவது வார்டில் உள்ளாட்சித் தேர்தலில் போட்டியிட்ட மாரிமுத்து நான் அதற்கான ஆவணங்களை கைவசம் வைத்திருக்கிறேன். நான் என்னுடைய பதவியை ஏற்க தடையாக அதிமுகவினர் இருக்கிறார்கள். எனது உயிருக்கு அவர்களால் ஆபத்து உள்ளது.
இன்னும் அந்தப் பதவிக்கான இடம் நிரப்பப்படாமல் காலியாக உள்ளது. சட்டப்படியும் நியாயப்படியும் நான் வென்ற வார்டு உறுப்பினர் பதவியை எனக்கு அளிக்க வேண்டுகிறேன். பதவியேற்க தடையாக உள்ள அலுவலர்கள் மீது மாவட்ட நிர்வாகம் உரிய நடவடிக்கை எடுத்து, எனக்கு பாதுகாப்பு அளிக்க வேண்டும். மேலும் என் பதவியை நான் ஏற்க ஏற்பாடு செய்துதர வேண்டும்” எனக் குறிப்பிட்டுள்ளார். மேலும் இது குறித்து நடவடிக்கை எடுக்காத பட்சத்தில் குடும்பத்துடன் தீக்குளிப்பேன் எனவும் அவர் வேதனையுடன் கூறியுள்ளார்.
விருதுநகரில் உள்ளாட்சித் தேர்தலில் தான் வெற்றி பெற்றதற்கான சான்றிதழ் பெற்றும் அரசு அலுவலர்கள் பதவி ஏற்கவிடாமல் அலைக்கழிப்பது சமூக செயற்பாட்டாளர்கள் மத்தியில் அதிருப்தியை ஏற்படுத்தியிருக்கிறது.
இதையும் படிங்க : குரூப் 2ஏ தேர்வு முறைகேடு வழக்கில் 4 அரசு ஊழியர்கள் கைது
