விருதுநகர் மாவட்டத்தில் உள்ள சிவகாசி மற்றும் அதனைச் சுற்றியுள்ள பகுதிகளில் ஆயிரத்து 70 பட்டாசு ஆலைகள் இயங்கி வருகின்றன. இத்தொழிலில் இரண்டு லட்சத்துக்கும் மேற்பட்ட தொழிலாளர்கள் நேரடியாகவும், மூன்று லட்சத்துக்கும் அதிகமானோர் உபதொழில்கள் மூலமும் வேலைவாய்ப்பு பெறுகின்றனர்.
நாட்டின் ஒட்டுமொத்த பட்டாசு தேவையில் 95 சதவீதத்தை சிவகாசி மற்றும் அதைச் சுற்றியுள்ள பகுதிகளில் இயங்கிவரும் பட்டாசு ஆலைகள் பூர்த்தி செய்கின்றன. இதன்மூலம் ஆண்டுக்கு சுமார் ரூ.7ஆயிரம் கோடி வரை பட்டாசு விற்பனை நடைபெறுகிறது. ஆனால், கடந்த நான்காண்டுகளாக பட்டாசுத் தொழில் பல்வேறு பிரச்னைகளை சந்தித்து வருகிறது.
கடந்த 2015ஆம் ஆண்டு பட்டாசு உற்பத்தி, விற்பனை, பயன்பாட்டுத் தடை செய்யக்கோரி உச்ச நீதிமன்றத்தில் பொதுநல வழக்கு தாக்கல் செய்யப்பட்டது. இதற்கு தடை விதிக்க நீதிமன்றம் மறுத்தது. ஆனால் பட்டாசு தயாரிக்க முக்கிய மூலப்பொருளாகப் பயன்படுத்தப்படும் பேரியத்துக்கும், சரவெடி தயாரிப்பதற்கும் தடை விதித்தது. இனி அனைத்து பட்டாசு ஆலைகளிலும் பசுமைப் பட்டாசுகள் மட்டுமே தயாரிக்க வேண்டும் என்று உச்ச நீதிமன்றம் உத்தரவிட்டது.
இதன் எதிரொலியாக கடந்த தீபாவளிக்குப் பிறகு சிவகாசியில் உள்ள ஆயிரத்து 70 பட்டாசு ஆலைகள் 3 மாதங்கள் மூடப்பட்டன. இதனால் இந்த ஆண்டு 40 சதவீதம் பட்டாசு உற்பத்தி குறைந்துள்ளது. இதுகுறித்து பட்டாசு விற்பனை செய்துவரும் சாந்தி மாரியப்பன் கூறும்போது, கடந்த மூன்று ஆண்டுகளை விட இந்த ஆண்டு 50 சதவீதத்திற்கு குறைவாகவே பட்டாசு உற்பத்தி செய்யப்பட்டு வந்த நிலையில், பருவ மழையின் காரணமாக அதிலும் 10 சதவீதம் குறைவு ஏற்பட்டு தற்போது 40 சதவீதம் மட்டுமே பட்டாசு உற்பத்தி செய்யப்பட்டு வருகிறது.
பட்டாசு உற்பத்தி என்பது இந்த ஆண்டு பற்றாக்குறையான அளவிலேயே உள்ளது. இதற்கு முக்கிய காரணம் கடந்த ஆண்டுகளில் ஏற்பட்ட நீதிமன்ற பிரச்னைகள் காரணமாக பட்டாசு தொழிலாளர்கள் வாழ்வாதராத்திற்காக பலர் திருப்பூர் போன்ற பல்வேறு பகுதிகளுக்கு இடம்பெயர்ந்துவிட்டனர்.
அதன் காரணமாக பட்டாசு உற்பத்தியில் தொழிலாளர்கள் பற்றாக்குறை என்பது அதிகரித்து வருகிறது. இந்த ஆண்டு பட்டாசு உற்பத்தி என்பது தொழிலாளர்கள் மகிழ்ச்சியாக தீபாவளியைக் கொண்டாடும் அளவில் இல்லை என வேதனையுடன் தெரிவிக்கிறார்.
மேலும் பட்டாசு கடை உரிமையாளர் குமார் கூறும்போது, கடந்த ஆண்டை ஒப்பிட்டுப் பார்க்கும்போது இந்தாண்டு சந்தையில் வாடிக்கையாளர் கூட்டம் குறைவாகவே உள்ளது. இதற்கு விலைவாசி உயர்வும் ஒரு காரணமாக இருந்து வருகிறது. பட்டாசு தொழிற்சாலைகள் மூடப்பட்டிருந்த நிலையில், தாமதமாகவே உற்பத்தி தொடங்கப்பட்டது.
அதனால் விற்பனையும் தாமதமாகவே தொடங்கப்பட்டது. கடந்த ஆண்டை விட 3 முதல் 5 சதவீதம் பட்டாசு விலை அதிகரித்துள்ளது. வாடிக்கையாளர்களிடம் பட்டாசு விலையேற்றம் குறித்த விளக்கங்கள் அளித்த பின்பும் அவர்களிடம் சற்று அதிருப்தி நிலவி வருகிறது என தெரிவித்தார்.
இதையும் படிங்க: ஒரே நாடு, ஒரே செயலி ஈடிவி பாரத் சேவை அளப்பரியது - மிஸ் இந்தியா புகழாரம்
