தென்காசி : தென்காசி மாவட்டத்தி பிரதான சுற்றுலாத்தலமான குற்றாலத்தில் உள்ள அருவிகளில் குளிப்பதற்கு இன்று (டிசம்பர் 15) முதல் மாவட்ட நிர்வாகம் அனுமதி அளித்துள்ளது. அதன்படி இன்று காலை முதல் பல்வேறு மாவட்டங்களிலிருந்து சுற்றுலாப் பயணிகள் அருவிகளில் குவிந்த வண்ணம் உள்ளனர்.
இந்நிலையில், மெயின் அருவியில் மேற்கொள்ளப்பட்டுள்ள பாதுகாப்பு ஏற்பாடுகள், கரோனா தடுப்பு நடவடிக்கைகள் குறித்து அம்மாவட்ட ஆட்சியர் சமீரன் இன்று ஆய்வு செய்தார். பின்னர் செய்தியாளர்களை சந்தித்து பேசிய அவர், "குற்றாலத்திலுள்ள அனைத்து அருவிகளிலும் கரோனா நெறிமுறைகளுக்கு உட்படுத்தப்பட்டு சுற்றுலா பயணிகள் அனுமதிக்கப்பட்டு வருகின்றனர். அதன்படி இன்று மதிய நேரம்வரை 800க்கும் மேற்பட்டோர் அருவிகளில் வருகை தந்து நீராடி சென்றுள்ளனர்.
மேலும் உடல் வெப்பநிலை பரிசோதனையின்போது அதிக வெப்பநிலை உள்ளவர்கள் திருப்பி அனுப்பப்பட்டு வருகின்றனர். அந்த வகையில் இன்று மூன்று பேர் திருப்பி அனுப்பப்பட்டுள்ளனர். தற்போது அருவிகளில் குளிக்க காலை 6 மணி முதல் மாலை 6 மணிவரை நேரம் நிர்ணயம் செய்யப்பட்டுள்ளது. கரோனா பரவலைப் பொறுத்து அருவியில் குளிப்பதற்கான நேரம் நீட்டிக்கப்பட வாய்ப்புள்ளது" என்றார்.
இதையும் படிங்க: 9 மாதங்களுக்குப் பின் திறக்கப்பட்ட குமரி குற்றாலம்: சுற்றுலாப் பயணிகள் வருகை
