போலி காவலர் சிறையில் அடைப்பு!

விழுப்புரம்: புதிய பேருந்து நிலையம் அருகே போலி காவலர் ஒருவர் கைது செய்யப்பட்டு, அவர் மீது நான்கு பிரிவுகளின் கீழ் காவல் துறையினர் வழக்குப்பதிவு செய்துள்ளனர்.

விழுப்புரம் அருகேயுள்ள கடையம் கிராமத்தைச் சேர்ந்தவர் தங்கமணி. இவரது மகன் படையப்பா என்கிற சிவா. பட்டதாரி இளைஞரான இவர் நேற்று விழுப்புரம் புதிய பேருந்து நிலையம் அருகே நின்று-கொண்டிருந்தார்.

இவரது செயல்பாடுகளில் சந்தேகமடைந்த பேருந்து நிலைய பாதுகாப்புப் பணியில் ஈடுபட்டிருந்த காவல் துறையினர், அவரை அழைத்து விசாரணை நடத்தியதில் அவர் தன்னை காவலர் என்றும் ஆயுதப் படையில் பணிபுரிந்துவருவதாகவும் கூறியுள்ளார்.

போலி காவலர் கைது

இதையடுத்து அவரது அடையாள அட்டையை வாங்கி பார்த்தபோது அது போலியானது எனத் தெரியவந்தது. இதைத் தொடர்ந்து அந்த நபரை கைது செய்த காவல் துறையினர், அவர் மீது நான்கு பிரிவுகளின் கீழ் வழக்குப்பதிவு செய்து சிறையில் அடைத்தனர்.