விழுப்புரம் மாவட்டம் திருவெண்ணெய்நல்லூரில் சிவஞான போதகத்தை உலகுக்கு உணர்த்திய மெய்கண்டாரின் கோயில் உள்ளது. இங்கு ஆண்டுதோறும் ஐப்பசி மாதம் சுவாதி நட்சத்திர தினத்தன்று குருபூஜை நடப்பது வழக்கம். அதன்படி, இன்று (28.10.2019) காலை 8 மணிக்கு திருமுறை விண்ணப்பத்துடன் குருபூஜை நிகழ்ச்சி தொடங்கியது.
அதைத் தொடர்ந்து 9 மணிக்கு மூலவருக்கு சிறப்பு அபிஷேகமும் மதியம் 12 மணிக்கு மெய்கண்டாருக்கு தீபாராதனை, குருபூஜைகளும் நடைபெற்றன. பின்னர், 1 மணிக்கு நடைபெற்ற ஆன்மிக சிறப்பு சொற்பொழிவில், சென்னை, மதுரை, விழுப்புரம், புதுச்சேரி, கடலூர் உள்ளிட்ட பல்வேறு பகுதிகளிலிருந்து ஆயிரத்துக்கும் மேற்பட்ட பக்தர்கள் பங்கேற்றனர்.
அப்போது மெய்கண்டார் சிறப்பு மலர் அலங்காரத்தில் பக்தர்களுக்கு அருள்பாலித்தார். மேலும், குருபூஜையில் பங்கேற்ற அனைவருக்கும் அறுசுவை விருந்து, மரக்கன்றுகள் வழங்கப்பட்டன.
