விழுப்புரம் மாவட்டம் திருவெண்ணெய்நல்லூர் அருகே உள்ள பெரியசெவலை கிராமத்தில் மாலிக் பாஷா என்பவர் கடந்த 10 ஆண்டுகளாக தமிழ்நாடு ஸ்டீல் எனும் பெயரில் இரும்பு கம்பி கடை வைத்து நடத்தி வருகிறார்.
இந்நிலையில், கடந்த 19ஆம் தேதி இரவு இவரது கடையின் பக்கவாட்டில் அமைக்கப்பட்டிருந்த இரும்பு தடுப்புச் சுவரை உடைத்து உள்ளே வந்த மர்ம நபர் ஒருவர் கல்லா பெட்டியில் வைத்திருந்த 80 ஆயிரம் ரூபாய் பணம், இரண்டு சவரன் மோதிரம் மற்றும் ஏடிஎம் அட்டை உள்ளிட்டவற்றை திருடிச் சென்றுள்ளார்.
மேலும், திருடிய ஏடிஎம் அட்டையைக் கொண்டு ஸ்டீல் கடையின் அருகில் உள்ள ஏடிஎம் இயந்திரத்தில் 20 ஆயிரம் ரூபாய் பணத்தை எடுத்துச் சென்றுள்ளார். மொத்தமாக ஒரு லட்சம் ரூபாய் பணம் திருடப்பட்டது குறித்து திருவெண்ணெய்நல்லூர் காவல் நிலையத்தில் புகார் அளிக்கப்பட்டுள்ளது.
இந்த புகாரின் பேரில் காவலர்கள் வழக்குப் பதிவு செய்து விசாரணை செய்து வரும் நிலையில், கொள்ளை சம்பவம் குறித்த சிசிடிவி காட்சிகள் தற்போது வெளியாகியுள்ளது. வெளியான சிசிடிவி காட்சிகளைக் கொண்டு காவலர்கள் விசாரணையை தீவிரப்படுத்தியுள்ளனர்.
இதையும் படிங்க: திமுக பேரணியில் பர்ஸை இழந்த சுப. வீரபாண்டியன்!
