வேலூர் மாவட்டம், காட்பாடியில் தமிழர் திருநாளான பொங்கல் திருநாளில் ஆண்டுதோறும் திமுக சார்பில் நடைபெறும் தொகுதி மக்கள் சந்திப்பு மற்றும் தொண்டர்கள் சந்திப்பு நிகழ்ச்சி நடைபெற்றது. இதில் திமுக பொருளாளரும் சட்டப்பேரவை எதிர்க்கட்சித் துணைத் தலைவருமான துரைமுருகன், தொண்டர்களுக்கு சால்வை அணிவித்து பொதுமக்களுடன் புகைப்படம் எடுத்துக்கொண்டார்.
இந்த விழாவில் வேலூர் நாடாளுமன்ற உறுப்பினர் கதிர் ஆனந்த், சட்டப்பேரவை உறுப்பினர் நந்தகுமார், திமுக நிர்வாகிகள் முகமது சகி, சுனில் உள்பட திரளான பொதுமக்களும் கலந்துகொண்டனர்.
பின்னர் துரைமுருகன் செய்தியாளர்களை சந்தித்தார். அப்போது செய்தியாளர் அவரிடம் திமுக கூட்டணியில் இருந்து காங்கிரஸ் விலகுவது போன்ற பேச்சுகள் எழுகிறதே என கேள்வி எழுப்பினார். இதற்கு துரைமுருகன், காங்கிரஸ் எங்கள் கூட்டணியிலிருந்து விலகிப் போனால் போகட்டும், எங்களுக்கு அதனால் நஷ்டமில்லை. காங்கிரஸ் கூட்டணியிலிருந்து விலகி சென்றாலும் அதைப்பற்றி கவலைப்படப் போவதில்லை. அவர்களுக்கு ஓட்டே கிடையாது, இதனால் எங்களுக்கு எந்த பாதிப்புமில்லை என்று தெரிவித்தார்.
