வேலூர் மாவட்டம், காட்பாடியில் திருவள்ளுவர் பல்கலைக்கழகம் உள்ளது. இந்தப் பல்கலைகழகத்தின் கீழ் வேலூர், திருவண்ணாமலை, கடலூர், விழுப்புரம் ஆகிய மாவட்டங்களில் 130 உறுப்புக் கல்லூரிகள் இயங்கி வருகின்றன.
இந்நிலையில், இப்பல்கலைக்கழகத்தின் கீழ் இயங்கும் அரக்கோணம், திருப்பத்தூர், கள்ளக்குறிச்சி, திட்டக்குடி ஆகிய நான்கு உறுப்புக் கல்லூரிகளில் தற்காலிகமாக பணியாற்றி வந்த 122 கவுரவ விரிவுரையாளர்களை பல்கலைக்கழகம் திடீரென பணி நீக்கம் செய்ததாகக் கூறப்படுகிறது. இதையடுத்து எந்தவித முன்னறிவிப்பும் இன்றி, பல்கலைகழக நிர்வாகம் தங்களை பணிநீக்கம் செய்ததாக விரிவுரையாளர்கள் குற்றம் சாட்டினர்.
மேலும், பணி நீக்கம் செய்யப்பட்டதால் தங்கள் குடும்ப சூழ்நிலை, வாழ்வாதாரம் பாதிக்கப்படுவதாக கூறி ஐம்பதுக்கும் மேற்பட்ட கவுரவ விரிவுரையாளர்கள் மீண்டும் பணி வழங்கக் கோரி நேற்று (ஜூன் 17) திருவள்ளுவர் பல்கலைக்கழக பதிவாளரை சந்தித்து மனு அளித்தனர்.
