வேலூர் மாவட்டம் நாடாளுமன்றத் தேர்தல்- ஆம்பூர், சோளிங்கர் குடியாத்தம் சட்டப்பேரவை இடைத்தேர்தலில் திமுக கூட்டணியில் போட்டியிடும் வேட்பாளர்களுக்கு ஆதரவாக இந்திய யூனியன் முஸ்லீம் லீக் கட்சியின் தேசிய தலைவர் காதர் மொகிதீன் பொதுமக்களிடையே வாக்குகள் சேகரித்தார். இதையடுத்து செய்தியாளர்கள் சந்திப்பில் மொகிதீன் பேசுகையில்,
"தமிழ்நாட்டில் பாஜகவின் கொள்கை ஏற்புடையது அல்ல. பாஜக அரசு, கோட்சே வழிதான் சிறந்தது என்ற கருத்தை முன்வைத்தே ஆட்சிபுரிகிறது. கீழ் மட்டத்திலிருந்து மேல் மட்டம் வரை அனைத்திலும் ஊழல் நிறைந்த ஆட்சி இன்றைய பாஜக ஆட்சி.
காமராஜர் முதல் ஜெயலலிதா வரை மூத்த தலைவர்கள் அனைவரும் தமிழ்நாட்டில் பாஜக காலூன்ற கூடாது என்ற முடிவில் இருந்தனர். ஆனால் பாஜக ஆட்சிக்கு காவடிதூக்கும் கட்சியாக இன்றைய அதிமுக உள்ளது. இன்றைய தமிழ்நாடு அரசு அழுகிய முட்டை போன்றது, அழுகிய முட்டையிலிருந்து குஞ்சு பொறிக்கலாம் என்பது முட்டாள்தனமானது"எனக் கூறினார்.
இதனிடையே தமிழ்நாட்டில் இந்திய யூனியன் முஸ்லீம் லீக் கட்சிக்கு ஒரு தொகுதி மட்டுமே ஒதுக்கப்பட்டுள்ளது என செய்தியாளர் எழுப்பிய கேள்விக்கு பதிலளித்த காதர் மொகிதீன், ஒரு தொகுதி என்பது முக்கியமல்ல. நாங்கள் தமிழ்நாட்டில் மதச்சார்பற்ற முற்போக்கு கூட்டணியை அமைத்துள்ளோம். இந்தியாவில் 25 மாநிலங்களில் இதுபோன்ற கூட்டணி இல்லை எனத் தெரிவித்தார்.
