வேலூர் மாவட்டம் ராணிப்பேட்டை கோட்டத்திற்கு உட்பட்ட ஆறு திரையரங்குகளில், நிர்ணயிக்கப்பட்ட கட்டணத்தை விட அதிகம் வசூலிக்கப்பட்டதை கண்டறிந்த அலுவலர்கள், அனைத்து திரையரங்குகளிலும் திடீர் ஆய்வு நடத்தினர்.
இதையடுத்து அரசு நிர்ணயித்த கட்டணத்தை விட கூடுதலாக வசூல் செய்த திரையரங்குகளில், கைப்பற்றிய தொகையை திரைப்படம் பார்த்த மக்களுக்கு திருப்பித் தருவதற்கான ஏற்பாடுகளையும் அலுவலர்கள் செய்தனர். இவர்கள் நடத்திய ஆய்வில் மொத்தமாக அனைத்து திரையரங்குகளிலும் ரூபாய் 34 ஆயிரம் கைப்பற்றப்பட்டது.
ஏசி வசதியுள்ள மல்டிபிளக்ஸ் தியேட்டர்களில் திரைப்படக் கட்டணம் ரூபாய் 120, மாநகராட்சி, நகராட்சி, பேரூராட்சி பகுதிகளில் உள்ள தியேட்டர்களில் திரைப்படக் கட்டணம் ரூபாய் 100, ஊராட்சிப் பகுதிகளில் ரூபாய் 75 மட்டுமே அரசு நிர்ணயித்துள்ளது. இந்த கட்டண விதியை மீறிய திரையரங்குகளுக்கு அரசு நிர்ணயித்ததை விட கூடுதலாக வசூல் செய்யக்கூடாது என்றும் அவர்கள் அறிவுறுத்தியுள்ளனர்.
இந்த ஆய்வில் ராணிப்பேட்டை ஆட்சியர் இளம்பகவத் தலைமையில், வாலாஜா வட்டாட்சியர் பூமா, ஆற்காடு வட்டாட்சியர் வத்சலா, நெமிலி வட்டாட்சியர் சதீஷ், அரக்கோணம் வட்டாட்சியர் ஜெயக்குமார், ஆகியோர் மற்றும் வருவாய் ஆய்வாளர்கள், கிராம நிர்வாக அலுவலர்கள் ஈடுபட்டனர்.
