“இது என்கவுண்டர் இல்லை..தற்காப்பு” - ரவுடி கொம்பன் ஜெகன் என்கவுண்டர் குறித்து திருச்சி எஸ்பி விளக்கம்!

Rowdy Komban Jagan encounter: இது என்கவுண்டர் இல்லை, காவல்துறையின் தற்காப்பிற்காக, பாதுகாப்பிற்காக சுடப்பட்டது என பிரபல ரவுடி ஜெகன் என்கவுண்டர் குறித்து திருச்சி எஸ்பி வருண்குமார் தெரிவித்துள்ளார்.

திருச்சி : திருவெறும்பூர் பனையக்குறிச்சியைச் சேர்ந்தவர் பிரபல ரவுடி ஜெகன் என்கிற கொம்பன் ஜெகன் (30). இவர் பல்வேறு கொலை, கொள்ளை வழக்குகளில் தேடப்பட்டு வந்த நிலையில், நேற்று திருச்சி போலீசாரால் என்கவுன்ட்டரில் சுட்டுக் கொல்லப்பட்ட சம்பவம் பெரும் அதிர்ச்சியை ஏற்படுத்தியது.

இந்நிலையில், திருச்சி மாவட்ட காவல்துறை கண்காணிப்பாளர் வருண்குமார் எண்கவுண்டர் குறித்து பேசுகையில், “கடந்த சில நாட்களாகவே துப்பாக்கி மற்றும் அரிவாளால் பன்றிகளைத் தாக்கி கடத்தி வருகின்றனர் என புகார்கள் வந்துள்ளது. மேலும், பொதுமக்களிடம் வழிப்பறியில் ஈடுபட்டு வருகிறார்கள் எனவும், ரவுடி கொம்பன் ஜெகன் அங்குள்ள சனமங்கலம் வனப்பகுதியில் பதுங்கி இருப்பதாகவும் தகவல் கிடைத்தது.

இதை அடுத்து காவல் உதவி ஆய்வாளர் அவரைப் பிடிக்கச் சென்றார். அப்போது வெடிகுண்டு மற்றும் பெட்ரோல் வெடிகுண்டு வைத்து ரவுடி ஜெகன், காவல் உதவி ஆய்வாளரின் மீது தாக்குதல் நடத்தி உள்ளார். மேலும், இடது கையில் வெட்டி உள்ளார். இதனால் தற்காப்பிற்காக காவல் உதவி ஆய்வாளர் இரண்டு முறை சுட்டு உள்ளார்

பின்னர் ஆம்புலன்ஸ் மூலமாக லால்குடி அரசு மருத்துவமனைக்கு, ரவுடி ஜெகனை கொண்டு சென்றனர். அங்கு அவசர சிகிச்சையில் அனுமதிக்கப்பட்டு சிகிச்சை பலனின்றி உயிரிழந்து விட்டார். மேலும், உடல்கூறு ஆய்விற்காக திருச்சி அரசு தலைமை மருத்துவமனைக்குக் கொண்டு செல்லப்பட்டார். காயம் பட்ட உதவி காவல் ஆய்வாளர் அரசு மருத்துவமனையில் சிகிச்சையில் உள்ளார்.

இது என்கவுண்டர் இல்லை, காவல்துறையின் தற்காப்பிற்காக, பாதுகாப்பிற்காக சுடப்பட்டது. சனமங்கலம் பகுதியில் வழிப்பறி நடைபெறுவதாக தகவல் வந்ததை அடுத்து, அங்கு சென்றபோது இந்த துப்பாக்கிச்சூடு நடந்தது. உடனே, ஜெகனை மருத்துவ சிகிச்சைக்காக கொண்டு சென்ற பின்னர், ஆய்வாளர் சம்பவ இடத்தில் பார்த்தபோது நாட்டுத் துப்பாக்கி, பெட்ரோல் வெடிகுண்டு, சணல் வெடிகுண்டு இருப்பதைக் கண்டறிந்தனர்.

வளர்ந்து வரும் ரவுடிகளுக்கு கேங் லீடராக செயல்பட்டுள்ளார், கொம்பன் ஜெகன். குறிப்பாக ராமஜெயம் கொலைக்கும், இதற்கும் சம்பந்தமில்லை" என்றார். மேலும் பேசிய அவர், “இப்போது வழக்குப் பதிவு செய்யப்பட்டு நீதிபதி விசாரணைக்கு அனுப்பப் போகிறோம். ஜெகன் பல இடங்களில் வழிப்பறி, அடிதடி, கொலை வழக்குகளில் சம்பந்தப்பட்டவர்.

திருச்சியில் 8 வழக்குகள், தமிழகம் முழுவதும் என 53 வழக்குகள் அவர் மீது உள்ளது. பல ரவுடிகள் கேங் லீடருடன் சேர்ந்து பல குற்றச் செயல்களில் ஈடுபட்டுள்ளார். சிறையில் இருக்கும் போதெல்லாம் பல ரவுடிகளிடம் தொடர்பு கொண்டு, பல குற்றங்களுக்கு திட்டம் தீட்டி உள்ளார். பல முக்கியஸ்தர்களை மிரட்டக்கூடிய வாய்ப்பு இருக்கலாம், ஆனால் அதுபோல புகார்கள் இதுவரை வரவில்லை.

கொம்பன் ஜெகன் ஏ ப்ளஸ் கேட்டகரியைச் சேர்ந்தவர். கடந்த 20 நாட்களுக்கு முன்பாக, இவரது கூட்டாளிகள் 20 பேரை கைது செய்துள்ளோம். தொடர்ச்சியாக நடவடிக்கைகள் எடுக்கப்பட்டு வருகிறது. குண்டாஸ் சட்டத்திற்கு வலிமை இருக்கிறது, வலிமை இல்லை என்பதை ஏற்றுக் கொள்ள முடியாது.

அங்கே சென்றவர்களுக்கு துப்பாக்கி வைத்திருப்பார் என்று தெரியவில்லை. அதன் பிறகு, சிறுகனூர் ஆய்வாளர் சென்று பார்த்தபோதுதான் துப்பாக்கி இருப்பது தெரிய வந்தது. ஆகையால், இனிதான் அதை விசாரணை செய்ய வேண்டும். தற்போது விசாரணை அதிகாரியாக லால்குடி டிஎஸ்பி அஜய் தங்கம் நியமித்து உள்ளோம்” என்றார்.

இதையும் படிங்க: இன்று ஆஜராக முடியாது.. போலீசாருக்கு மன்சூர் அலிகான் கடிதம்!