திருச்சி ஏர்போர்ட் திலகர் தெருவைச் சேர்ந்தவர் சத்தியமூர்த்தி. இவரது மகன் அஜித்குமார் (21), கூலித்தொழிலாளி. அஜித்குமார் அப்பகுதியைச் சேர்ந்த கல்லூரியில் படிக்கும் 17 வயது இளம்பெண்ணை ஒருதலைபட்சமாக காதலித்து வந்துள்ளார். ஆனால் அந்தப் பெண் இவரை காதலிக்க மறுத்துவிட்டார்.
இந்நிலையில் சமூக வலைதளத்தில் உள்ள அப்பெண்ணின் புகைப்படங்களை மார்பிங் செய்து இணையதளத்தில் வெளியிட்டு விடுவதாக அஜித்குமார் மிரட்டியுள்ளார்.
இது குறித்து இளம் பெண்ணின் பெற்றோர் பொன்மலை அனைத்து மகளிர் காவல் நிலையத்தில் புகார் செய்தனர். இதையடுத்து அஜித்குமார் மீது போக்சோ சட்டத்தின் கீழ் வழக்குப்பதிவு செய்யப்பட்டு, அவரை காவல் துறையினர் கைது செய்தனர்.
இந்த வழக்கின் விசாரணை திருச்சி மாவட்ட மகிளா நீதிமன்றத்தில் நடைபெற்று வந்தது. வழக்கை விசாரித்த நீதிபதி மகிழேந்தி, குற்றம்சாட்டப்பட்ட அஜித்குமாருக்கு ஆறு ஆண்டுகள் சிறை தண்டனையும், ரூ. 5,000 அபராதமும் விதித்து தீர்ப்பளித்தார்.
