திருச்சி: மறைந்த சட்டமாமேதை அம்பேத்கரின் 130ஆவது பிறந்தநாள் இன்று (ஏப்ரல் 14) கொண்டாடப்படுகிறது. இதை முன்னிட்டு அரசியல் கட்சியினர் மற்றும் பல்வேறு அமைப்பினர் அம்பேத்கருக்கு மரியாதை செலுத்தி வருகின்றனர். அந்த வகையில், அதிமுக திருச்சி புறநகர் வடக்கு மாவட்டம் சார்பில் அம்பேத்கர் உருவ படத்திற்கு மாலை அணிவித்து மரியாதை செலுத்தப்பட்டது.
தில்லை நகரில் உள்ள புறநகர் மாவட்ட அலுவலகத்தில் நடைபெற்ற இந்த நிகழ்வுக்கு அதிமுக திருச்சி புறநகர் வடக்கு மாவட்ட செயலாளர் பரஞ்சோதி தலைமையில் மாலை அணிவித்து மரியாதை செலுத்தினர்.
மேலும், தில்லை நகர் சாஸ்திரி சாலையில் உள்ள திமுக முதன்மைச் செயலாளர் கே.என்.நேரு அலுவலகத்தில் டாக்டர் அம்பேத்கரின் உருவப் படத்திற்கு மத்திய மாவட்ட பொறுப்பாளர் வைரமணி தலைமையில் திமுகவினர் மாலை அணிவித்து மரியாதை செலுத்தினர்.
அதேபோல, தர்மபுரி பாட்டாளி மக்கள் கட்சியின் கட்சி அலுவலகத்தில் அம்பேத்கர் சிலைக்கு பாமக மாநில துணைப் பொதுச்செயலாளர் எஸ்பி வெங்கடேஸ்வரன் மாலை அணிவித்து மரியாதை செலுத்தினார். இந்நிகழ்ச்சியில், முன்னாள் தர்மபுரி நாடாளுமன்ற உறுப்பினர் பாரி மோகன் உள்ளிட்ட 100க்கும் மேற்பட்ட பாட்டாளி மக்கள் கட்சியினர் கலந்துகொண்டு அம்பேத்கர் படத்திற்கு மாலை அணிவித்து மரியாதை செலுத்தினா்
மேலும், மயிலாடுதுறை மாவட்டம் சீர்காழி புதிய பேருந்து நிலையத்தில் அமைந்துள்ள அம்பேத்கர் சிலைக்கு அதிமுக, திமுக, விடுதலைச் சிறுத்தைகள், நாம் தமிழர் கட்சியினர் மாலை அணிவித்து மரியாதை செலுத்தினர்.
இதையும் படிங்க: 'தரம் தாழ்ந்த அரசியல் செய்கிறது பாஜக' - திருமாவளவன் தாக்கு
