திருப்பூர் மாவட்டம் மங்கலம் சாலை பாரப்பாளையம் பகுதியில் கடந்த மூன்று மாதங்களாக இரவு நேரங்களில் மின் தடை செய்யப்பட்டு, காலையில் மீண்டும் விநியோகிக்கப்படுகிறது. இதனால் வேலைக்குச் சென்றுவருவோரின் தூக்கம் பாதிக்கப்படுவதுடன், குழந்தைகளை இருட்டில் வைத்துக்கொண்டு பெண்கள் அச்சத்துடன் வசித்துவருகின்றனர்.
மேலும், திருப்பூரின் மற்ற பகுதிகளில் மின் விநியோகம் சீராக உள்ள நிலையில், பாரப்பாளையம் பகுதியில் மட்டும் மின் தடை செய்யப்படுவதாகவும், இரவு நேரத்தில் மின்சாரத்தை முறையாக விநியோகிக்கக் கோரி அப்பகுதி பொதுமக்கள் தங்கள் குழந்தைகளுடன் திருப்பூர் - மங்கலம் சாலையில் நள்ளிரவு 1 மணி அளவில் சாலை மறியலில் ஈடுபட்டனர்.
இதனையடுத்து, பொதுமக்களின் சாலை மறியல் குறித்த தகவலறிந்த திருப்பூர் மத்திய காவல்நிலைய காவல் துறையினர், மின்வாரிய அலுவலர்கள் சம்பவ இடத்திற்கு விரைந்து பேச்சுவார்த்தை நடத்தி மின்விநியோகம் சீரமைக்கப்படும் என உறுதியளித்ததையடுத்து பொதுமக்கள் போராட்டத்தை கைவிட்டு கலைந்துசென்றனர்.
