திருப்பத்தூர்: வாணியம்பாடி அடுத்த புத்துக்கோவில் பகுதியில் உள்ள பெங்களூர் - சென்னை தேசிய நெடுஞ்சாலை மேம்பாலத்தில் வருகின்ற 14 ஆம் தேதி அம்பேத்கர் பிறந்தநாளையொட்டி விடுதலை சிறுத்தைகள் சார்பில் நீலச்சட்டை பேரணி நடத்தப்படும் என அறிவிப்பு பேனர் ஒட்டப்பட்டிருந்தது.
இந்நிலையில் அதனை அதே பகுதியை சேர்ந்த சிலர் கிழித்துள்ளனர் என்பது தெரியவந்தள்ளது. பின்னர் இதுகுறித்து விடுதலை சிறுத்தை கட்சியினர் அம்பலூர் காவல்நிலையத்தில் புகார் அளித்தனர். பின்னர் மீண்டும் அதே இடத்தில் புதிய பேனரை ஒட்டவைத்தனர்.
இதனைத் தொடர்ந்து புகாரின் பேரில் காவல்துறையினர் வழக்குபதிவு செய்து பேனரை கிழித்தது குறித்து புத்துகோவில் பகுதியை சேர்ந்த குமார் மற்றும் கௌதம் ஆகிய இருவரை கைது செய்தனர். இந்நிலையில் கைது செய்தவர்களை விடுவிக்கக்கோரி கைதான இருவரின் உறவினர்கள் புத்துகோவில் பகுதியில் போராட்டத்தில் ஈடுப்பட்டனர்.
இதனை தொடர்ந்து காவல்துறையினர் போராட்டத்தில் ஈடுப்பட்டவர்களிடம் பேச்சு வார்த்தையில் ஈடுப்பட்டனர். மேலும் போராட்டம் தொடர்ந்தால் அதிக அளவு காவல்துறையினர் புத்துக்கோவில் பகுதியில் குவிக்கப்பட்டு போராட்டத்தில் ஈடுப்பட்டவர்களை கலைத்து அப்பகுதியில் உள்ள கடைகளை அடைக்க உத்தரவிட்டனர்.
இதனை தொடர்ந்து சம்பவ இடத்தில் திருப்பத்தூர் மாவட்ட காவல்கண்காணிப்பாளர் பாலகிருஷ்ணன் நேரில் ஆய்வு செய்தார். மேலும் இந்நிகழ்வால் விடுதலை சிறுத்தை கட்சியினர் மீண்டும் புதியதாக ஒட்டவைத்த அம்பேத்கர் புகைப்படத்துடன் கூடிய பேனரை வருவாய் துறையினர் அகற்றினர். இந்நிகழ்வால் புத்துக்கோவில் பகுதியில் சில மணிநேரம் பரபரப்பாக காணப்பட்டது.
இதையும் படிங்க: பல்வீர் சிங் பல் பிடுங்கிய விவகாரம் - விசாரணைக்கு ஒருவர் கூட ஆஜராகாததால் அதிகாரிகள் குழப்பம்!
