உலகப் புகழ் பெற்ற அறுபடை வீடுகளில் இரண்டாம் படை வீடான திருச்செந்தூர் அருள்மிகு சுப்பிரமணிய சுவாமி திருக்கோயிலில் கந்த சஷ்டி திருவிழாவின் சூரசம்ஹாரம், நேற்று முன்தினம் முடிவடைந்த நிலையில், இன்று குமரவிடங்க பெருமானுக்கும், தெய்வானை அம்பாளுக்கும் திருக்கல்யாணம் நடைபெற்றது.
அதைத் தொடர்ந்து, இன்று திருக்கல்யாண வைபவத்தை முன்னிட்டு திருக்கோயிலில் அதிகாலை 3 மணிக்கு நடை திறக்கப்பட்டு, பூஜைகள் நடைபெற்றன. காலை 5 மணிக்கு மேல் தெய்வானை அம்பாள் தவசுக்குப் புறப்பட்டு, தெப்பக் குளத் தெருவில் உள்ள திருக்கல்யாண மண்டபத்துக்கு வந்து சேர்ந்தார்.
அங்கு அம்மனுக்கு ஏராளமான பெண் பக்தர்கள் மாவிளக்கு எடுத்து வழிபட்டனர். மாலையில் சுவாமி குமரவிடங்கப்பெருமான் மாப்பிள்ளை கோலத்தில் தனிச் சப்பரத்தில் எழுந்தருளி, தவசு மண்டபத்தில் உள்ள தெய்வானை அம்பாளுக்குக் காட்சியளித்தார். தொடர்ந்து தெற்கு ரதவீதி - மேலரதவீதி சந்திப்பில் சுவாமி, அம்பாள் தோள் மாலை மாற்றும் நிகழ்ச்சி நடைபெற்றது.
பின்னர் சுவாமியும் அம்பாளும் திருக்கோயில் வந்து சேர்ந்தனர். கிழக்கு கோபுர வாயிலில் அமைந்துள்ள மண்டபத்தில் வைத்து திருக்கல்யாண வைபவமும் கும்பம் வைத்து ஹோமமும் நடைபெற்றது. சுவாமியும் அம்பாளும் ஊஞ்சலில் அழகாக அலங்கரிக்கப்பட்டு காட்சி கொடுத்தனர். அப்போது பக்தர்கள் 'முருகருக்கு அரோகரா' என கோஷங்கள் எழுப்பினர். இதைத் தொடர்ந்து, திருமாங்கல்ய தாரணம் வெகு விமரிசையாக நடைபெற்றது.
இந்த விழாவில் பக்தர்கள் திருக்கல்யாண வைபவத்துக்கு மொய் எழுதி, பிரசாதம் பெற்றுச்சென்றனர். ஆயிரக்கணக்கான பக்தர்கள் கலந்துகொண்டு சுவாமியின் கல்யாண உற்சவத்தைத் தரிசனம் செய்தனர்.
இதையும் படிங்க: திருச்செந்தூர் முருகன் கோயிலில் இன்று சூரசம்ஹாரம்: லட்சக்கணக்கான பக்தர்கள் வருகை!
