கரோனா பாதிப்பு காரணமாக ஊரடங்கை மே 31ஆம் தேதி வரை நீட்டித்து தமிழ்நாடு அரசு உத்தரவிட்டுள்ளது. இந்நிலையில், தூத்துக்குடியில் போக்குவரத்து, தொழிற்சாலைகள், அரசுப் பணியாளர்களுக்குத் தளர்வு அளிக்கப்பட்டுள்ளது. இதுதொடர்பான செய்தியாளர் சந்திப்பு மாவட்ட ஆட்சியர் அலுவலகத்தில் இன்று நடைபெற்றது.
அப்போது, ஆட்சியர் சந்தீப் நந்தூரி கூறுகையில், "பத்தாம் வகுப்பு பொதுத்தேர்வு நடக்க இருப்பதையொட்டி மாவட்டத்தில் உள்ள அனைத்துப் பள்ளிகளையும் தேர்வு மையங்களாக மாற்றுவதற்கு ஆலோசித்து வருகிறோம். வெளியூரில் சிக்கித்தவிக்கும் தூத்துக்குடி மாவட்டத்தைச் சேர்ந்த பத்தாம் வகுப்பு மாணவர்கள், ஆசிரியர்களுக்கு இ-பாஸ் வழங்குவதற்கு நடவடிக்கைகளை எடுத்து வருகிறோம்.
மாணவ-மாணவிகள் தேர்வு எழுதுவதற்கு வாகன வசதி தேவைப்பட்டால் சிறப்பு பேருந்துகளை இயக்க நடவடிக்கை எடுக்கப்படும். தூத்துக்குடி மாவட்டத்தைச் சேர்ந்த 40 பேர் கரோனா பாதிப்புடன் மருத்துவமனையில் சிகிச்சைப் பெற்று வருகின்றனர். மாவட்டத்தில் புதிதாக 11 நோய்க் கட்டுப்பாட்டு மண்டலங்கள் உருவாக்கப்பட்டுள்ளன.
வடமாநிலத் தொழிலாளர்கள் 8 ஆயிரத்து 700 பேரை, அவர்களின் விருப்பத்தின் பேரில் சொந்த மாநிலங்களுக்கு அனுப்பி வைக்க நடவடிக்கை எடுக்கப்பட்டுள்ளது. பிகார், ஜார்க்கண்ட், உத்தரப்பிரதேசம் உள்ளிட்ட மாநிலங்களுக்கு சிறப்பு ரயில்கள் மூலமாக வடமாநிலத் தொழிலாளர்கள் அனுப்பி வைக்கப்பட்டுள்ளனர்.
மேலும் எஞ்சியுள்ள தொழிலாளர்களையும் ஒருங்கிணைத்து சொந்த மாநிலங்களுக்கு அனுப்பிவைக்க ஏற்பாடுகள் நடைபெற்று வருகிறது. மாவட்ட எல்லைகளில் உள்ள சோதனைச் சாவடிகள் வழியாக, உள்நுழைபவர்களை பரிசோதிக்கும் வகையில் "தெர்மல் இமேஜ் ஸ்கேன் கருவி" பொருத்தப்படுகிறது. இதன்மூலமாக மாவட்டத்திற்குள் புதிதாக உள் நுழையும் நபர்களைத் தூரத்தில் இருந்தவாறே காய்ச்சலுடன் இருக்கிறாரா என்பதைக் கண்டறியலாம்.
இது சோதனை ஓட்டமாக இன்று முதல் மாவட்ட ஆட்சியர் அலுவலகத்தில் செயல்பாட்டுக்குக் கொண்டு வரப்பட்டுள்ளது. மேலும் அரசின் அறிவிப்புப்படி நாளை முதல் சில தளர்வுகள் தூத்துக்குடி மாவட்டத்தில் அமல்படுத்தப்படும்.
அதனடிப்படையில், அரசு ஊழியர்கள் வந்து செல்வதற்கு சிறப்புப் பேருந்துகள் இயக்கப்படும். மாவட்டத்திற்குள் சென்று வருவதற்கு பொதுமக்களுக்கு எவ்வித அனுமதிச் சீட்டும் தேவையில்லை. பொதுப் போக்குவரத்துக்கு அனுமதி கிடையாது" என்றார்.
இதையும் படிங்க:ஒரு பிஸ்கெட்தான்: 130 கி.மீ. நடந்துவந்த குடிபெயர்ந்தோருக்கு உணவளித்த டிசிபி!
