'கமல் செய்வது எல்லாமே தில்லு முல்லுதான்...!' - ராஜேந்திரபாலாஜி

தூத்துக்குடி: கமல்ஹாசனின் மக்கள் நீதி மய்யம் ஒன்றும் ஐநா சபையால் அங்கீகாரம் பெற்ற அமைப்பு கிடையாது. அவர் செய்வது எல்லாமே தில்லு முல்லுதான் என்று அமைச்சர் ராஜேந்திர பாலாஜி விமர்சித்துள்ளார்.

மக்கள் நீதி மய்யம் கட்சித் தலைவர் கமல்ஹாசன், தேர்தல் பரப்புரையின்போது 'இந்து தீவிரவாதி' என பேசியது சர்ச்சையை கிளப்பியுள்ளது.

இதனைக் கண்டித்து, 'கமல்ஹாசனின் நாக்கு அறுக்கப்பட வேண்டும்' என்று தமிழ்நாடு பால்வளத் துறை அமைச்சர் ராஜேந்திர பாலாஜி கடும் விமர்சனம் செய்தார். இதற்கு, மக்கள் நீதி மய்யம் கட்சி பொதுச்செயலாளர் அருணாச்சலம், "அமைச்சர் ராஜேந்திர பாலாஜி தனது பதவி பிரமாண உறுதிமொழியை மீறி இருக்கிறார். எனவே, அவர் பதவி விலக வேண்டும்" என்று சாடி அறிக்கை வெளியிட்டார்.

இதற்கு பதிலளித்து, தூத்துக்குடியில் செய்தியாளர்களிடம் பேசிய ராஜேந்திர பாலாஜி, "கமல்ஹாசன் கட்சி ஒன்றும், ஐநா சபையின் அங்கீகாரம் பெற்ற அமைப்பு கிடையாது. அவர்கள் செய்வது எல்லாமே தில்லு முல்லு. இந்தியாவின் மத நல்லிணக்கத்தை கெடுப்பதுபோல செயல்படுகிறார்கள். நான் எந்த வகையிலும் பதவிப் பிரமாண உறுதிமொழியை மீறவில்லை. பயங்கரவாத தூண்டுதல் செய்யவில்லை. மக்களின் மனதை புண்படுத்தும் விதமாக பேசவில்லை.

இந்தியாவின் முதல் தீவிரவாதி இந்துதான் என்று கமல்ஹாசன் கூறுவது இந்துக்களை வம்புக்கிழுக்கும் வேலை. கமல்ஹாசன் இதை சொல்வதற்கு அவர் ஐஎஸ் இயக்கத்தில் இருந்து பணம் வாங்கிக் கொண்டாரா? இதனை மத்திய புலனாய்வுத் துறை விசாரிக்க வேண்டும். அவர் சொன்ன கருத்துக்கு ஒரு தமிழனாக, இந்தியக் குடிமகனாக இருந்து என்னுடைய கருத்தைத்தான் தெரிவித்தேன்.

அவர் இப்படிப் பேசுவது பிரிவினைவாதம், மதவாதத்தை தூண்டுவதாகதான் அர்த்தம். அவரை பின்னால் இருந்து இயக்குவது யார்? எனக்கு யாரையும் புண்படுத்தும் நோக்கம் இல்லை. ஆனால், அவர் மீதுள்ள குற்றத்தை மறைப்பதற்காகவும், மீண்டும் தவறு செய்வதற்கு தூண்டுவதற்கும் செய்கின்ற வேலையைதான் இந்த அறிக்கை உள்ளது.

கமல்ஹாசனுக்கு ஆதரவு தெரிவித்த கே.எஸ். அழகிரி, கி.வீரமணி ஆகியோர் தமிழ்நாட்டில் இருப்பதற்கு தகுதி இல்லாதவர்கள். எப்போதும் கி.வீரமணி மக்கள் மனதை புண்படும்படியாகவும், திமிராகத்தான் பேசுவார். அவர் பேச்சை அடக்கிப் பேச வேண்டும்" என்றார்.