தூத்துக்குடி: தமிழ்நாட்டில் பணிபுரியும் புலம் பெயர் தொழிலாளர்கள் தாக்கப்படுவதாக கடந்த சில மாதங்களுக்கு முன்பு சில வதந்தி வீயோக்கள் பரவி தேசிய அளவில் பெரும் பரபரப்பை ஏற்படுத்தியது. அதைத் தொடர்ந்து காவல்துறையினர் அந்த வீடியோ வெறும் வதந்தி என்றும், இந்த சம்பவம் தமிழ்நாட்டில் இல்லை வேறு எங்கோ நடந்த சம்பவம் என்றும், அனைத்து வடமாநில தொழிலாளர்களும் பாதுகாப்புடன் இருக்கின்றனர் என்றும் தமிழ்நாடு அரசு மற்றும் காவல்துறை சார்பில் அறிவிக்கப்பட்டது.
அதன் பிறகு இந்த வதந்தி பரப்பிய நபர் குறித்து காவல்துறை மற்றும் சைபர் கிரைம் போலீசார் தேடிவந்தனர். பின்னர் அவர் உத்திரப்பிரதேசத்தை பிரசாந்த் உம்ராவ் என்பவதும் அவர் அம்மாநில பாஜக செய்தித் தொடர்பாளராக இருப்பதும் தெரியவந்தது.பிரசாந்த் உம்ராப் மீது தூத்துக்குடி மத்திய பாகம் காவல் நிலையத்தில் சட்ட ஒழுங்கு பிரச்சனையை ஏற்படுத்துதல் உள்ளிட்ட பிரிவுகளின் கீழ் வழக்குப் பதிவு செய்யப்பட்டது.
தற்போது இந்த வழக்கு தொடர்பாக மதுரை உயர்நீதிமன்றத்தில் ஜாமீன் கேட்டு பிரசாத் உமராவ் மனு தாக்கல் செய்திருந்தார். இதை அடுத்து மதுரை உயர் நீதிமன்றம் பிரசாந்த் உம்ராவ் சம்பந்தப்பட்ட காவல் நிலையத்தில் தொடர்ந்து 15 நாட்கள் ஆஜராக வேண்டுமென உத்தரவிட்டது. இதைத் தொடர்ந்து பிரசாத் உம்ராவ் இந்த உத்தரவுக்கு எதிராக டெல்லி உச்ச நீதிமன்றத்தில் மனு தாக்கல் செய்தார்.
இந்த மனுவை விசாரித்த டெல்லி உச்ச நீதிமன்றம் பிரசாந்த் உம்ராவை இன்று தூத்துக்குடி மத்தியபாகம் காவல் நிலையத்தில் ஆஜராக உத்தரவிட்டு ஜாமீன் வழங்கியது. உச்சநீதிமன்ற உத்தரவு படி, தூத்துக்குடி மத்தியபாகம் காவல் நிலையத்தில் பிரஷாந்த் உம்ராவ் ஆஜரானார்.
இவரை திருச்செந்தூர் டிஎஸ்பி வசந்தராஜ், தூத்துக்குடி டிஎஸ்பி சத்யராஜ் மற்றும் மத்திய பாகம் காவல் ஆய்வாளர் ஐயப்பன் ஆகியோர் விசாரணை மேற்கொண்டு வருகின்றனர். இந்த விசாரணையானது, இன்று மாலை 6 மணி வரை நடைபெறுவதாக போலீசார் தரப்பில் கூறப்பட்டது.
ரஷாந்த் உம்ராவ் தூத்துக்குடி மத்திய காவல் நிலையத்தில் 2 மணி நேரம் நடைபெற்ற விசாரணையில், அவருடைய வாக்குமூலங்கள் அனைத்தும் வீடியோவாக பதிவு செய்யப்பட்டதாக தெரிவிக்கப்பட்டுள்ளது. அதைத் தொடர்ந்து விசாரணையின் இடைவேளையின் போது வெளியே வந்த அவரிடம் செய்தியாளர்களிடம் பேசிய அவர், "நீதிமன்ற உத்தரவின்படி இன்று மத்திய பாகம் காவல் நிலையத்தில் ஆஜராக வந்ததாகவும், போலீசார் எந்த தொந்தரவும் அளிக்காமல் தன்னிடம் நடந்து கொண்டனர்" எனக் கூறினார். மேலும் இரண்டு நாட்கள் பிரசாந்த் உம்ராவிடம் விசாரணை நடைபெறும் என தெரிகிறது.
இதையும் படிங்க: தமிழ்நாடு - புதுச்சேரி மீனவர்கள் நடுக்கடலில் மோதல்; நடந்தது என்ன?
