கழுகுமலை அருகே சோகம்: குழந்தையை அடித்து கொன்ற தாய், ஆண் நண்பர் கைது

தூத்துக்குடி: கழுகுமலை அருகே ஒரு வயது குழந்தையை அடித்துக் கொன்ற தாய், அவரது ஆண் நண்பரான பால் வியாபாரி ஆகிய இருவரையும் காவல்துறையினர் கைது செய்தனர்.

தூத்துக்குடி மாவட்டம், கோவில்பட்டி வட்டம், கழுகுமலை அடுத்த பழங்கோட்டையைச் சேர்ந்தவர் ராஜு (40). இவரது மனைவி வடகாசி(35) மின்வாரிய அலுவலகத்தில் ஊழியராக பணிபுரிந்துவருகிறார். இந்த தம்பதிக்கு ஒரு வயதில் தானேஷ் பிரபாகரன் என்ற ஆண் குழந்தை உள்ளது.

இந்நிலையில், வடகாசிக்கும், கழுகுமலையைச் சேர்ந்த பால் வியாபாரியான சாமி என்ற சாமிநாதனுக்கும்(32) இடையே திருமணத்தை மீறிய உறவு இருந்துள்ளது. இதையறிந்த வடகாசியின் கணவர் ராஜு இருவரையும் கண்டித்துள்ளார்.இருவருக்கும் அடிகடி தகராறு ஏற்படுவதால் ராஜு குழந்தை தானேஷ் பிரபாகரனை சங்கரன்கோவிலில் உள்ள மாமியார் வீட்டில் விட்டுள்ளார்.

இந்நிலையில், நேற்று முன்தினம் ராஜு, தனது மனைவி வடகாசியிடம், சங்கரன்கோவிலில் உள்ள குழந்தையை தூக்கிக் கொண்டு வருமாறு கூறியுள்ளார். இதைத் தொடர்ந்து வடகாசி சங்கரன்கோவிலுக்குச் சென்று குழந்தையை தூக்கிக் கொண்டு பழங்கோட்டைக்கு வராமல் கழுகுமலையில் உள்ள சாமிநாதன் வீட்டிற்கு சென்றுள்ளார்.

குழந்தையை தூக்க சென்ற வடகாசி மாலைஆகியும் வீடுதிரும்பாததால், சந்தேகமடைந்த ராஜூ, கழுகுமலையில் உள்ள சாமிநாதன் வீட்டிற்கு சென்று பார்த்த போது, வடகாசி குழந்தையுடன் அங்கிருப்பது தெரியவந்தது. மேலும் குழந்தை அழுதுக்கொண்டே இருந்ததால், ஆத்திரமடைந்த இருவரும் குழந்தையை சரமாரியாக தாக்கியுள்ளனர்.

இதையறிந்த ராஜூ குழந்தை மீட்க அருகில் சென்றபோது, இருவரும் குழந்தையுடன் பின்பக்க வாசல் வழியாக தப்பிச் சென்றனர். பின்னர் காயமடைந்த நிலையில் இருந்த குழந்தையை சிகிச்சைக்காக அரசு மருத்துவமனைக்கு இருவரும் கொண்டு சென்றனர். அங்கு குழந்தையை பிரிசோதித்த மருத்துவர்கள், ஏற்கனவே இறந்து விட்டதாக தெரிவித்தனர்.

கொல்லப்பட்ட குழந்தை

இது குறித்து, ராஜு கழுகுமலை காவல் நிலையத்தில் புகார் அளித்ததைத் தொடர்ந்து வழக்குப் பதிவு செய்த காவல் துறையினர் குழந்தையைக் கொன்ற தாய், அவரது ஆண் நண்பரான பால் வியாபாரி ஆகிய இருவரையும் கைது செய்தனர்

.