தூத்துக்குடி: தூத்துக்குடியில் கிராம உதயம் என்ற தன்னார்வ அமைப்பு சார்பில் சுற்றுச்சூழலை பாதுகாக்க வலியுறுத்தி, அந்த அமைப்பின் 25வது ஆண்டு வெள்ளி விழா நிகழ்ச்சி இன்று (செப்.22) தூத்துக்குடி அருகே உள்ள முத்தையாபுரத்தில் நடைபெற்றது. இந்நிகழ்ச்சியில் சிறப்பாக சேவை புரிந்தவர்களுக்கு அப்துல் கலாம் விருது வழங்கும் விழா மற்றும் 2 ஆயிரம் பேருக்கு மரக்கன்று மற்றும் மஞ்சள் பை வழங்கும் விழா நடைபெற்றது.
இந்த நிகழ்ச்சியில் திரைப்பட நடிகையும், இயக்குநருமான லட்சுமி ராமகிருஷ்ணன் கலந்து கொண்டு மரக்கன்றுகள் மற்றும் விருதுகளை வழங்கினார். பின்னர் அவர் செய்தியாளர்களைச் சந்தித்து கூறுகையில், “வளர்ந்த நாடுகளை விட இந்தியாவில் பெண்களுக்கு எதிரான குற்றங்கள் குறைவாகவே உள்ளது. தற்போது மீடியா மற்றும் செல்போன், வாட்ஸ் அப் உள்ளிட்ட நவீன சாதனங்கள் மூலம் இந்த குற்றங்கள் வெளியே தெரிகின்றன.
இது வரவேற்க வேண்டிய விஷயம். இந்த குற்றங்களைத் தடுக்க பல்வேறு சட்டங்கள் உள்ளது. ஆனால், இவை முறையாக கட்டுப்படுத்த பல கட்டங்களில் முடியவில்லை. சட்டங்கள் முறையாக செயல்படுத்த முடியாமல், சட்டங்களில் உள்ள ஓட்டைகளை பயன்படுத்தி பெண்களுக்கு எதிரான குற்றங்களில் ஈடுபடுபவர்கள் தப்பித்து விடுகின்றனர். இதை தடுக்க வேண்டும்.
அதேபோன்று, மன அழுத்தத்தினால் திடீரென்று சில நிமிடங்களில் எடுக்கும் முடிவால் தற்கொலைகள் நடக்கின்றன. இதற்கு வாழ்க்கையில் எந்த பிரச்னை வந்தாலும் எதிர்த்து போராடக் கூடிய மனநிலையை உருவாக்க வேண்டும். மரணத்திற்கு தற்கொலை தீர்வாகாது. வாழ்க்கையில் போராட பழகிக் கொள்ள வேண்டும். தற்போது மத்திய அரசு 33 சதவீதம் இட ஒதுக்கீடு பெண்களுக்காக கொண்டு வந்துள்ளது.
இது வரவேற்க வேண்டிய ஒன்று. இது வெறும் பேப்பராக இல்லாமல், நடைமுறைக்கு வர வேண்டும். தமிழகத்தில் பல்வேறு இடங்களில் அரசு நிர்வாகங்களில், உள்ளாட்சி அமைப்புகளில் பெண்கள் பதவியில் இருக்கிறார்கள். ஆனால், அதற்குப் பின்னால் அவர்களது கணவர் மற்றும் உறவினர்கள் செயல்பட்டு வருகிறார்கள். இவ்வாறு இல்லாமல் பெண்கள் உரிய முறையில் செயல்பட அனுமதிக்க வேண்டும்.
அப்பொழுதுதான் அவர்களுக்கு பெண்களுக்குரிய பிரச்சினைகளில் தீர்வு காண முடியும்” என தெரிவித்தார். தொடர்ந்து சீமான் - விஜயலட்சுமி விவகாரம் குறித்து கூறுகையில், “என்னிடம் இது போன்று பாதிக்கப்பட்டோர் நேரடியாக வருகிறார்கள். அவர்களுக்கு உரிய தீர்வை நான் கூறி வருகிறேன்.
அதேபோன்று, இந்த விஷயத்தில் பாதிக்கப்பட்டவர்கள், சம்பந்தப்பட்டவர்கள் என்னிடம் கேமரா முன்பு வந்து பேசினால், என்னுடைய ஆலோசனையை வழங்குவேன். அவ்வாறு அவர்கள் இல்லாமல் இந்த பிரச்னையைப் பற்றி பேசுவது தவறானதாகும்” என்றார்.
பின்னர், விஜய் அரசியலுக்கு வருவது குறித்து கேட்டபோது, “அரசியலுக்கு யார் வேண்டுமானாலும் வரலாம். ஆனால், அவர்கள் மக்கள் சேவையாற்றி இருக்க வேண்டும். கீழ் மட்டத்தில் பல்வேறு பணிகள் செய்துவிட்டு, பின்னர் அரசியலுக்கு வர வேண்டும். தமிழக மக்கள் வணிக ரீதியான படங்களை மற்றும் வெற்றியடைய வைக்காமல், நல்ல கருத்துள்ள தரமான படங்களையும், சிறிய படங்களையும் திரையரங்குக்கு வந்து பார்த்து வெற்றியடைய வைக்க வேண்டும்” எனக் கூறினார்.
இதையும் படிங்க: மகளிர் உரிமைத் திட்ட பயனாளிகள் ஒவ்வொருவருக்கும் முதலமைச்சர் ஸ்டாலின் கடிதம்!
