நாடு முழுவதும் கரோனா வைரஸின் தாக்கம் நாளுக்கு நாள் அதிகரித்துவருகிறது. இதனைக்கட்டுப்படுத்தும் நோக்கில் மே 17ஆம் தேதிவரை ஊரடங்கு நீட்டிக்கப்பட்டுள்ளது. அத்தியாவசிய தேவைகளின்றி பொதுமக்கள் வெளியே நடமாட தடைவிதிக்கப்பட்டுள்ளது. இதன் காரணமாக கடந்த நாற்பது நாள்களுக்கு மேலாக பல்வேறு தரப்பட்ட தொழிலாளர்கள் தங்களது கடைகளை திறக்கமுடியால் பொருளாதார ரீதியாக பெரிதும் பாதிக்கப்பட்டுள்ளனர்.
இந்நிலையில், திருவாரூரில் முடி திருத்தும் தொழிலாளர்கள் தங்களது வாழ்வாதாரத்தை பாதுக்காக்க வேண்டி மாவட்ட ஆட்சியரிடம் மனு அளித்துள்ளனர். அப்போது செய்தியாளர்களிடம் தெரிவித்ததாவது, 'கரோனா வைரஸை கட்டுப்படுத்தும் நோக்கில் பிறப்பிக்கப்பட்டுள்ள 144 தடை உத்தரவு அமலில் இருக்கும் நேரத்தில் அத்தியாவசிய கடைகள் தவிர மற்ற எந்த கடைகளையும் திறக்கக் கூடாது என தமிழ்நாடு அரசு அறிவித்திருந்தது. இந்நிலையில் நாங்கள் கடந்த 40 நாள்களாக கடையை திறக்காமல் அரசின் உத்தரவை மதித்து வீட்டிலேயே முடங்கி இருந்தோம்.
இதனால், திருவாரூர் மாவட்டத்தில் இருக்கும் முடிதிருத்தும் தொழிலாளர்கள் அனைவரும் பசியோடும் பட்டினியோடும் வாழ்ந்து வருகின்றோம். வீட்டு வாடகை மற்றும் கடை வாடகை வசூலிக்க வரும் உரிமையாளர்களிடம் அதை கட்ட முடியாத நிலைக்கு தள்ளப்பட்டுள்ளோம். மத்திய அரசு அறிவித்துள்ள ஆரஞ்சு, பச்சை, உள்ளிட்ட மாவட்டங்களில் கடை பாதுகாப்போடு சமூக இடைவெளியிலும் திறக்க அனுமதி அளிக்கப்பட்டுள்ளது. அதேபோல் திருவாரூரிலும் நாங்கள் பணி செய்ய காலை 7 மணி முதல் 10 மணி வரை கடையை திறக்க அனுமதிக்க வேண்டும் என மாவட்ட ஆட்சியரிடம் கோரிக்கை வைத்துள்ளோம்' என தெரிவித்தனர்.
இதையும் பார்க்க: சென்னையில் டாஸ்மாக் கடைகள் திறக்கப்படாது - தமிழ்நாடு அரசு அறிவிப்பு!
