திருப்பத்தூர் மாவட்டம், ஆம்பூர் கம்பிகொல்லைப் பகுதியில் இளைஞர் ஒருவர் நாட்டுத் துப்பாக்கியை வீட்டில் பதுக்கி வைத்து இரவு நேரங்களில் வனவிலங்குகளை வேட்டையாடி வருவதாக ஆம்பூர் நகர காவல் துறையினருக்கு ரகசியத் தகவல் கிடைத்துள்ளது.
அதன்பேரில் ஆம்பூர் காவல் துணை கண்காணிப்பாளர் சரவணன், ஆய்வாளர் திருமால் ஆகியோர் தலைமையிலான காவல் துறையினர் கம்பிகொல்லைப் பகுதியில் திடீர் சோதனை மேற்கொண்டனர். அப்போது, இளைஞர் ஒருவர் காவல் துறையினரைக் கண்டு தெறித்து ஓடினார்.
இதனைக் கண்டு அவரை விரட்டிச் சென்று பிடித்த காவல் துறையினர், அவரிடம் விசாரணை மேற்கொண்டனர். விசாரணையில் அவர் திருவண்ணாமலை மாவட்டம், ஜமுனாமுத்தூர் அருகேவுள்ள பலாமருத்தூர் பகுதியைச் சேர்ந்த சதீஷ்குமார் என்பது தெரியவந்தது.
திருமணம் செய்துகொண்ட பின்னர் அவர் ஆம்பூரிலுள்ள மாமியார் வீட்டில் தங்கி இருப்பதும் தெரியவந்தது. பின்னர், வீட்டில் மறைத்து வைத்திருந்த நாட்டுத்துப்பாக்கி, மூன்று மான்கொம்புகளைப் பறிமுதல் செய்து காவல் துறையினர், அவரைக் கைது செய்து வழக்குப்பதிவு செய்து விசாரணை மேற்கொண்டு வருகின்றனர்.
