திருவண்ணாமலை வேங்கிக்கால் பகுதியிலுள்ள இமாலயா ஹோட்டலில் தமிழ்நாடு காங்கிரஸ் கட்சியின் தலைவர் கே.எஸ். அழகிரி செய்தியாளர்களை சந்தித்தார், அப்போது அவர் கூறுகையில், "மாணவர்கள் நீட் தேர்வு அச்சத்தின் காரணமாக தற்கொலைக்கு முயற்சி செய்கின்றனர். நீட் தேர்வுக்கு உண்டான பாடத்திட்டம் வேறு, தமிழ்நாடு மாணவர்கள் பயிலும் பாடத்திட்டம் வேறு என்பதால் நீட் தேர்வை நமது மாணவர்கள் எதிர்கொள்வதற்கு கடினமாக உள்ளது.
தமிழ்நாடு மாணவர்கள் இதுவரை பயின்று வந்த பாடத்திட்டத்திற்கும் நீட் தேர்வில் கேட்கப்படும் கேள்விகளுக்கும் சம்பந்தமில்லாமல் உள்ளது. இந்தியாவில் ஒரே மாதிரியான கல்வி முறை சாத்தியமில்லை, காரணம் சமூகம், சமூக வளர்ச்சி ஒரே மாதிரியாக இருந்தால் தான் தேர்வு முறை, பாட முறையும் ஒரே மாதிரியாக இருக்க முடியும்.
மதசார்பற்ற கட்சிகளின் கூட்டணி தலைவராக இருக்கும் திமுக தலைவர் ஸ்டாலின், நாங்கள் ஆட்சிக்கு வந்தவுடன் நீட் தேர்வை ரத்து செய்வோம் என்று சொல்லி இருக்கிறார். இது வரவேற்க வேண்டிய அம்சம், தமிழ்நாடு அரசும் இதில் ஒரு தெளிவான நிலைபாட்டை எடுத்து இங்கு ஒன்று பேசுவதும் டெல்லியில் ஒன்று பேசுவதும் இல்லாமல் இங்கு பேசுவதையே டெல்லியிலும் பேசி மத்திய அரசை தன்னுடைய நிலைக்கு கொண்டுவர வேண்டும் என முதலமைச்சரைக் கேட்டுக்கொள்கிறேன்.
காங்கிரஸ் கட்சியைச் சேர்ந்த ஆரணி மக்களவை உறுப்பினர் விஷ்ணுபிரசாத் திருவண்ணாமலை மாவட்டத்தில் மத்திய அரசின் திட்டத்தின் கீழ் கட்டப்படும் வீடுகளில் மாபெரும் ஊழல் நடைபெற்றிருப்பதாக ஆதாரங்களுடன் கூறியிருக்கிறார், ஆதாரங்கள் எல்லாம் உண்மையானவை, மிகவும் சிரமப்பட்டு அந்த ஆதாரங்களை அவர் பெற்றிருக்கிறார்.
ஒரு மக்களவை உறுப்பினர் ஒரு குற்றச்சாட்டை சொல்லி 48 மணி நேரம் ஆகிறது. இதுவரை இந்த மாவட்டத்தினுடைய ஆட்சியர், உள்ளாட்சி துறை அமைச்சர், தமிழ்நாட்டினுடைய முதலமைச்சர் உள்ளிட்டோரிடமிருந்து அதற்கு பதில் வரவில்லை. மக்களுடைய வரிப் பணம் ஏமாற்றப்பட்டு இருக்கிறது. அரசாங்கம் ஏமாற்றப்பட்டு இருக்கிறது.
ஒரு கும்பலான குற்றவாளிகள் சேர்ந்து இவ்வளவு தவறை செய்திருக்கிறார்கள். அதனை ஒரு மக்களவை உறுப்பினர் தெளிவாக எடுத்துச் சொன்ன பிறகும்கூட முதலமைச்சர் அதன்மீது நடவடிக்கை எடுக்கவேண்டும் அல்லது மறுப்புத் தெரிவிக்கவேண்டும்" என்றார்.
இதையும் படிங்க: நீட் தேர்வு எதிர்ப்பு; இந்திய மாணவர் சங்கத்தினர் போராட்டம்
