திருவள்ளூர் மாவட்டம் அத்திப்பட்டி பகுதியிலுள்ள வட சென்னை அனல் மின் நிலையத்தில், நாளொன்றுக்கு 5 அலகுகளில் 1830 மெகாவாட் மின் உற்பத்தி செய்யும் பணியில் ஒப்பந்த அடிப்படையில் சுமார் ஆயிரத்து 600 தொழிலாளர்கள் பணிபுரிந்து வருகின்றனர். இதற்கான ஊதியத்தை ஒப்பந்ததாரரிடம் ஊழியர்கள் பெற்று வந்த நிலையில், கடந்த ஒன்பது மாத காலமாக ஒப்பந்ததாரர்களுக்கு பணிக்கான காசோலைகளை மின்வாரியம் வழங்கவில்லை என கூறப்படுகிறது.
இதனால் தொழிலாளர்களுக்கு ஊதியம் வழங்க முடியாத நிலை ஏற்பட்டுள்ளது. காசோலைகளை வழங்குமாறு சம்பந்தப்பட்ட ஒப்பந்ததாரர்கள் மின்வாரியத்திடம் பலமுறை முறையிட்டும் நடவடிக்கை எடுக்கப்படவில்லை. இதனால் பாதிக்கப்பட்ட ஓப்பந்ததாரர்கள் இன்று அனல் மின் நிலைய நுழைவு வாயில் முன்பு கண்டன ஆர்ப்பாட்டத்தில் ஈடுபட்டனர்.
அப்போது, தமிழ்நாடு மின் வாரியம் நிலுவையிலுள்ள பணிக்கான காசோலை தொகையை உடனடியாக வழங்காவிட்டால் காலவரையற்ற வேலை நிறுத்தப் போராட்டத்தில் ஈடுபடப் போவதாக எச்சரிக்கை விடுத்துள்ளனர். இந்தப் போராட்டத்தால் தமிழ்நாட்டில் உள்ள மின் வாரியங்களின் மின் உற்பத்தி பாதிக்கப்படும் என்பது குறிப்பிடத்தக்கது.
இதையும் படிங்க:
பேனர் விவகாரம்: திமுக, அதிமுக தவிர மற்ற அரசியல் கட்சிகளிடம் உயர் நீதிமன்றம் கேள்வி!
