திருவள்ளூர் மக்களவைத் தொகுதி அதிமுக வேட்பாளர் டாக்டர் வேணுகோபால் மற்றும் பூவிருந்தவல்லி சட்டப்பேரவைத் தொகுதி இடைத்தேர்தலில் போட்டியிடும் அதிமுக வேட்பாளர் வைத்தியநாதன் ஆகிய இருவரை ஆதரித்து தாமரைபாக்கத்தில் தேர்தல் பரப்புரை பொதுக் கூட்டம் நேற்று நடைபெற்றது. இதில், பாட்டாளி மக்கள் கட்சியின் நிறுவனர் டாக்டர் ராமதாஸ் கலந்து கொண்டார்.
கூட்டத்தில், ராமதாஸ் பேசுகையில், "திருவள்ளூர் தொகுதியில் டாக்டர் வேணுகோபால் மீண்டும் வெற்றிபெறுவார். 70 ஆண்டுகால திமுக முடிவுக்கு வரும். அக்கட்சியின் கடைசி அத்தியாத்தை ஸ்டாலினே முடித்து வைப்பார். கருத்து கணிப்பில் பாஜக 350-க்கும் மேற்பட்ட தொகுதிகளில் வெற்றிபெறும். காங்கிரஸ் கட்சி சரிவுப் பாதையில் இருக்கிறது. இந்தியாவில் ஐந்து மாநிலங்களை மட்டுமே ஆள்கிறது. காங்கிரஸ் திமுக இணைந்து கச்சத்தீவு, காவேரி பிரச்னை, இலங்கை தமிழர்களை கொன்றது உள்ளிட்ட பல்வேறு துரோகங்களை செய்தது. இதை என்றைக்கும் மன்னிக்க முடியாது" என்றார்.
