திருவள்ளூர் மாவட்டம் மணவாளநகர் அருகே உள்ள கீழாத்தூர் பகுதியைச் சேர்ந்தவர் செல்வம்(35). கட்டடத் தொழிலாளியான இவருக்கு, மனைவியும் மகனும் உள்ளனர். இந்நிலையில், அவரது மகனுக்கு திடீரென காய்ச்சல் ஏற்பட்டது. இதனையடுத்து மகனையும், மனைவியையும் அழைத்துக்கொண்டு இரு சக்கர வாகனத்தில் திருவள்ளூர் அரசு மருத்துவமனைக்கு சென்றுகொண்டிருந்தார்.
அப்போது எதிர்பாராவிதமாக மணவாள நகரிலிருந்து ஸ்ரீ பெருமந்தூர் நோக்கிச் சென்ற லாரி, எதிரே வந்த இருசக்கர வாகனத்தின் மீது மோதியதில் செல்வம் சம்பவ இடத்திலேயே மரணமடைந்தார்.
இந்தச் சம்பவத்தைப் பார்த்த அப்பகுதி மக்கள் உடனடியாக செல்வத்தின் மனைவியையும் மகனையும் சிறு காயங்களுடன் மருத்துவமனைக்கு அனுப்பி வைத்தனர். தகவலறிந்து சம்பவ இடத்திற்கு வந்த மணவாளநகர் காவல்துறையினர் இறந்தவரின் உடலை மீட்டு பிரேதப் பரிசோதனைக்காக திருவள்ளூர் அரசு மருத்துவமனைக்கு அனுப்பிவைத்தனர்.
விபத்து குறித்து காவல்துறையினர் வழக்குப் பதிவு செய்து விசாரித்து வருகின்றனர்.
