கரோனா தொற்றுப் பரவலைக் கட்டுப்படுத்த அமல்படுத்தப்பட்ட ஊரடங்கால், பல்வேறு தொழில் நிறுவனங்கள் மூடப்பட்டுள்ளன. இதன் காரணமாக, பலர் வேலைவாய்ப்பை இழந்து, தங்கள் அன்றாட தேவைகளைப் பூர்த்தி செய்ய முடியாமல் பெரும் இன்னலைச் சந்தித்து வருகின்றனர்.
இந்தநிலையில், ஊராட்சி வார்டு உறுப்பினர் ஒருவர் வங்கியில் கடன் வாங்கி, மக்களுக்கு நிவாரணப் பொருட்கள் வழங்கி வருகிறார். திருவள்ளூர் மாவட்டம், செம்பரம்பாக்கம் அருகே சான்ட்ரோ சிட்டி பகுதியைச் சேர்ந்தவர் ராஜாமணி.
செம்பரம்பாக்கம் ஊராட்சி 3ஆவது வார்டு உறுப்பினரான இவர், கரோனா ஊரடங்கால் பாதிக்கப்பட்டுள்ள மக்களுக்கு உதவ திட்டமிட்டார். ஆனால், இவரிடம் போதியப் பொருளாதார வசதியில்லை.
இருப்பினும், நிவாரண பொருட்களை வழங்குவதற்காக, வங்கியில் 10 லட்ச ரூபாய் கடனாகப் பெற்றுள்ளார். அந்தப் பணத்தைக் கொண்டு, ஊனமுற்றோர், நலிவடைந்தோர், விதவைகள் என, ஆயிரம் குடும்பங்களுக்கு அரிசி, பருப்பு உள்ளிட்ட அத்தியாவசியப் பொருட்கள் வழங்க ஏற்பாடு செய்து, ஒரு குடும்பத்திற்கு ஒரு மாதத்திற்குத் தேவையான நிவாரணம் பொருட்களை வழங்கிவருகிறார்.
அது மட்டுமின்றி, கிருமிநாசினி, முகக்கவசம் போன்ற பாதுகாப்பு உபகரணங்களையும், தனது மனைவி பத்மாவதியுடன் இணைந்து செம்பரம்பாக்கம் ஊராட்சியில் வழங்கி வருகிறார். இதுகுறித்து ராஜாமணியிடம் கேட்டபோது, ’கடந்தாண்டு கரோனா ஊரடங்கால் மக்கள் பாதிக்கப்பட்டபோது, கண்கூட பார்த்தேன்.
இதனால் என்னால் முயன்றதைச் செய்ய நினைத்தேன். என் குடும்பத்தினரும் ஆதரவு அளிக்கின்றனர். ஊரடங்கு முடியும் வரைத் தொடர்ந்து, மக்களுக்கு என்னால் இயன்றதைச் செய்வேன்’ என்றார்.
தனது வார்டு மக்களுக்காக, எவ்வித எதிர்பார்ப்புமின்றி ராஜாமணி, வங்கியில் கடன் பெற்று உதவி செய்து வருவது அப்பகுதியில் பேசும் பொருளாகியுள்ளது.
இதையும் படிங்க: உண்டியல் பணத்தை முதலமைச்சர் நிவாரண நிதிக்கு வழங்கிய சிறுவர்கள்!
