திருநெல்வேலி: கூடன்குளம் அணுமின் நிலையத்திற்கு ரஷ்யாவில் இருந்து வந்த அதிக உயரம் கொண்ட கனரக உதிரி பாகங்கள் தேசிய நெடுஞ்சாலையில் உள்ள விஸ்வநாதபுரம் விலக்கிலிருந்து கூடங்குளத்திற்கு எடுத்துச் செல்லப்படுவதினால் அந்த வழியில் உள்ள லெவிஞ்சிபுரம், கன்னங்குளம், கூட்டப்புளி, ஜெயமாதாபுரம், செட்டிகுளம், ஸ்ரீ ரங்க நாராயணபுரம், பெருமனல் ஆகிய பகுதிகளில் பாதுகாப்பு கருதி நேற்று காலை 9 மணி முதல் மதியம் மூன்று மணி வரை மின்சாரம் நிறுத்தப்படுவதாக மின்வாரியம் அறிவித்திருந்தது.
திருநெல்வேலி மாவட்டம் கூடங்குளம் அணுமின் நிலையத்தில் 3, 4, 5 மற்றும் 6 அணு உலைகள் கட்டப்பட்டு வருகின்றன. இதில் மூன்று மற்றும் நான்காம் அணு உலைகள் சுமார் 39 ஆயிரத்து 747 கோடி ரூபாயில் கட்டப்பட்டு வருகிறது. இதன் மின் உற்பத்தி அடுத்த வருடத்திற்குள் தொடங்கும் என இலக்கு நிர்ணயிக்கப்பட்டுள்ளது. தற்பொழுது 80 சதவீதம் கட்டுமான பணிகள் முடிவடைந்து, அதில் மின் உற்பத்திக்கான உதிரி பாகங்கள் பொருத்தும் பணிகள் நடைபெற்று வருகின்றன.
இதேபோல் ஐந்து மற்றும் ஆறாவது அணு உலைகள் சுமார் 49 ஆயிரத்து 621 கோடி ரூபாய் திட்ட மதிப்பீட்டில் வருகிற 2027 ஆம் ஆண்டிற்குள் மின் உற்பத்தி தொடங்க இலக்கு நிர்ணயிக்கப்பட்டு அதன் பணிகள் நடைபெற்று வருகின்றன. ஐந்து மற்றும் ஆறாம் அணு உலைகளிலும் கட்டுமான பணிகள் நடைபெற்று வருகின்றன.
கடந்த சில மாதங்களாக ரஷ்யா - உக்ரைன் போர் தீவிரமாக நடைபெற்றதனால் ரஷ்யாவில் இருந்து கூடங்குளம் கட்டுமான பணிகளுக்காக வரவேண்டிய உதிரி பாகங்கள் வர முடியாத சூழ்நிலை ஏற்பட்டது. இதனால் மூன்று மற்றும் நான்காம் அணு உலைகளின் உதிரி பாகங்கள் பொருத்தும் பணியில் தொய்வு ஏற்பட்டு இருந்தது.
இந்த நிலையில் தொடர்ச்சியாக தற்போது ரஷ்யாவில் உள்ள பீட்டர்ஸ் பார்க் துறைமுகத்திலிருந்து மூன்று மற்றும் நான்காம் அணு உலைகளுக்கும் ஐந்து மற்றும் ஆறாம் அணு உலைகளுக்கான உதிரி பாகங்கள் தூத்துக்குடி துறைமுகத்திற்கு வந்தடைந்து, அங்கிருந்து சாலை மார்க்கமாக கூடங்குளம் கொண்டு வரப்படுகின்றன.
இது போல் நேற்று நீராவி இயந்திரங்களுக்கு பொருத்தக்கூடிய முக்கிய உதிரி பாகங்கள் சாலை மார்க்கமாக வந்ததினால், நெல்லை தேசிய நெடுஞ்சாலையை தாண்டி விசுவநாதபுரம் விலக்கிலிருந்து கூடங்குளம் செல்லும் பாதையில் உள்ள பகுதிகளில் மின்சாரம் தடை செய்யப்பட்டு சாலைகளின் குறுக்கே செல்லும் தாழ்வான மின் ஒயர்களை அகற்றி உதிரி பாகங்கள் கூடங்குளத்திற்கு எடுத்து செல்லப்பட்டன.
இதனால் கூடங்குளம் ஒட்டி உள்ள லெவிஞ்சிபுரம், கண்ணன் குளம், கூட்டப்புள்ளி, ஜெய மாதாபுரம், செட்டிகுளம், ஸ்ரீ ரெங்க நாராயணபுரம், பெருமணல் ஆகிய பகுதிகளில் நேற்று காலை 9 மணி முதல் இரவு நீண்ட நேரம் ஆகியும் மின் விநியோகம் நிறுத்தி வைக்கப்பட்டிருந்தது. இந்நிலையில், இரவு ஒன்பது மணிக்கு பின்னர் அணுமின் நிலையத்திற்கு உதிரி பாகங்கள் ஏற்றி வந்த கனரக வாகனங்கள் கடந்து சென்ற பின்னரும், வெட்டப்பட்ட மின் வயர்களை சரி செய்வதற்காக மின் வினியோகம் நிறுத்தப்பட்டிருந்தது.
இதனால் ஆத்திரம் அடைந்த பொதுமக்கள் ஸ்ரீ ரெங்க நாராயணபுரத்தில் சாலை மறியலில் ஈடுபட்டனர். பின்னர் மின்சார ஊழியர்கள், போலீசார் கிராம மக்களுடன் பேச்சுவார்த்தையில் ஈடுபட்டனர். பேச்சுவார்த்தைக்கு பின்பு இரவு சுமார் 9 மணி அளவில் மின்விநியோகம் வழங்கப்பட்டது. இதனால் சாலை மறியல் போராட்டம் கைவிடப்பட்டது.
கூடங்குளம் அணுமின் நிலைய கட்டுமான பணிகள் 2002 ஆம் ஆண்டில் தொடங்கப்பட்டு முதல் மற்றும் இரண்டாம் அணு உலைகள் முடிவு பெற்று மின் உற்பத்தி செய்து வரும் நிலையில் முதல் முறையாக இந்த வழித்தடத்தில் மின் வினியோகம் தடை செய்து உதிரி பாகங்கள் கூடங்குளத்திற்கு கொண்டு செல்வது முதல் முறை என்பது குறிப்பிடத்தக்கது.
இதையும் படிங்க: காதணி விழாவுக்கு வந்தவர்களுக்கு இலவச ‘கீழடி’ நூல் வழங்கல்!
