பதவிகாலம் முடிந்தும் நீடிக்கும் மனோன்மணியம் சுந்தரனார் பல்கலைக்கழக துணை வேந்தர்

நெல்லையின் மனோன்மணியம் சுந்தரனார் பல்கலைக்கழகத்தில் பதவி காலம் முடிந்தும் துணை வேந்தர், மற்றும் சில அலுவலர்கள் பணியில் நீடிப்பதாக புகார் எழுந்துள்ளது.

திருநெல்வேலி: தமிழ்நாட்டின் மிகப் பழமை வாய்ந்த பல்கலைக்கழகங்களில் நெல்லை மனோன்மணியம் சுந்தரனார் பல்கலைக்கழகமும் ஒன்று. இப்பல்கலைக்கழகத்தின் கீழ் 91 உறுப்பு கல்லூரிகள் 6 பல்கலைக்கழக கல்லூரிகள் மற்றும் 3 மனோ கல்லூரிகள் செயல்படுகின்றன. தென்காசி, தூத்துக்குடி, திருநெல்வேலி, கன்னியாகுமரி ஆகிய நான்கு மாவட்டங்களைச் சேர்ந்த சுமார் ஒரு லட்சத்து 60 ஆயிரம் மாணவர்கள் பயின்று வருகின்றனர்.

முறைகேடு: இந்நிலையில், சமீப காலமாக மனோன்மணியம் சுந்தரனார் பல்கலைக் கழகத்தில் பல்வேறு முறைகேடுகள் நடைபெறுவதாகத் தொடர் புகார்கள் எழுந்த வண்ணம் உள்ளது. குறிப்பாக பேராசிரியர்கள், உதவி பேராசிரியர்கள் மற்றும் இணை பேராசிரியர்கள் பணி நியமணத்தில் பல்வேறு முறைகேடுகள் நடப்பதாக ஏற்கனவே லஞ்ச ஒழிப்புத் துறையில் புகார் செய்யப்பட்டு, இதுதொடர்பாக காவல்துறையினர் பல்கலைக்கழகத்தில் விசாரணை மேற்கொண்டனர்.

சமீபத்தில் பிரபல எழுத்தாளர் அருந்ததி ராய் எழுதிய நூலை பாடப்புத்தகத்தில் இருந்து நீக்கியது பெரும் சர்ச்சையை ஏற்படுத்தியது. இதுபோன்ற சூழலில் மனோன்மணியம் சுந்தரனார் பல்கலைக்கழகத்தில் துணைவேந்தரில் தொடங்கி பதிவாளர், நிதி அலுவலர், தொலைதூர கல்வி இயக்குனர் எனப் பல்வேறு முக்கிய பதவியில் இருப்பவர்கள் பணி காலம் முடிந்த பிறகும் பொறுப்பு அலுவலராக செயல்பட்டு வருகின்றனர்.

பதவி காலம் முடிந்தும் நீடிக்கும் துணை வேந்தர்: அதாவது, தற்போது துணைவேந்தராக உள்ள பிச்சுமணியின் 3 ஆண்டு பதவி காலம் கடந்த பிப்ரவரி மாதம் 15ம் தேதி முடிவு பெற்றது. இருப்பினும் புதிய துணைவேந்தர் நியமிக்கப்படாததால் பிச்சுமணியே துணை வேந்தராக நீடிக்கிறார். அதேபோல் ஏற்கனவே பதிவாளராக இருந்தவர் ஓய்வுபெற்ற பிறகும் கடந்த ஒரு வருடமாக புதிதாக பதிவாளர் நியமிக்கப்படாததால் மருது குட்டி என்பவர் பொறுப்பு பதிவாளராக நியமிக்கப்பட்டார்.

அவர் ஒரு ஆண்டாக பணியாற்றி வந்த நிலையில், கடந்த மார்ச் மாதம் 20ஆம் தேதி அவர் 60 வயது பூர்த்தியடைந்து பணி ஓய்வு பெற்றார். இருப்பினும் தற்போது வரை அவர் பொறுப்பு பதிவாளராகத் தொடர்ந்து வருகிறார். அதேபோல் பல்கலைக்கழக நிதி அலுவலரின் பதவி காலம் கடந்த மார்ச் 9-ம் தேதியுடன் முடிவடைந்த நிலையில் மார்ச் 31 வரை எந்தவித அதிகாரப்பூர்வ அறிவிப்பும் இல்லாமல் அவர் பணியில் நீடித்ததாகக் கூறப்படுகிறது.

தற்போது துணை பதிவாளரான வள்ளி நாயகியை பொறுப்பு நிதி அலுவலராக நியமித்துள்ளனர், எனவே நிதி அலுவலரும் பொறுப்பு பட்டியலில் இடம் பெற்றுள்ளார். அதேபோல் தேர்வுக் கட்டுப்பாட்டாளர் சுருளி பாண்டியின் பணிக்காலம் கடந்த ஒன்றரை ஆண்டுகளுக்கு முன்பு நிறைவு பெற்ற நிலையில், அவரும் தற்போது வரை பொறுப்பு கட்டுப்பாட்டு அலுவலராகப் பணியில் நீடிக்கிறார்.

இதுபோதாது என்று தொலைதூர கல்வி இயக்குனர் பாலசுப்ரமணியமும் பணி காலம் முடிவுற்றும் பொறுப்பு இயக்குனராக பணிபுரிந்து வருகிறார். இதேபோல் பல்கலைக்கழக நிர்வாகத்தின் முக்கிய அலுவலர்கள் அனைவரும் பொறுப்பில் இருப்பதால் பல்வேறு வளர்ச்சிப் பணிகள் பாதிக்கப்படுவதாகவும், பல்வேறு முறைகேடுகள் நடைபெறும் சூழல் ஏற்பட்டிருப்பதாகவும் இங்கு பணியாற்றும் பேராசிரியர்கள் குற்றம்சாட்டியுள்ளனர்.

பணிநீக்கம் செய்ய வேண்டும்: இதற்கிடையில் ஓய்வுபெற்ற பிறகும் பொறுப்பு பதிவாளராக பணிபுரிந்து வரும் மருது குட்டியை உடனடியாக பணி நீக்கம் செய்யக்கோரி பேராசிரியர் சாமுவேல் ஆசிர் ராஜ் துணைவேந்தரிடம் புகார் மனு ஒன்றை அளித்துள்ளார். இதுகுறித்து சாமுவேல் ஆசிர்ராஜை தொடர்பு கொண்டு கேட்டபோது, ” தமிழ்நாடு அரசின் சட்ட விதிப்படியும் மனோன்மணியம் பல்கலைக்கழகத்தின் 1990 சட்டப்படியும் பதிவாளர் என்பவர் 60வயது பூர்த்தி அடைந்த உடன் ஓய்வு பெறவேண்டும்.

ஓய்வுபெற்ற பிறகு ஒருநாள் கூட அவர் அந்த பதவியில் நீடிக்க கூடாது, ஆனால் தற்போது பதிவாளராகப் பொறுப்பிலிருக்கும் மருதகுட்டி கடந்த மார்ச் 20-ஆம் தேதியே ஓய்வு பெற்றுவிட்டார், ஆனாலும் தற்போது வரை அவர் பொறுப்பு பதிவாளராகப் பணிபுரிந்து வருகிறார்.

இது சட்டவிரோதமானது, இதுகுறித்து நிர்வாகத்திடம் கேட்டால் அகாடமிக் ஆண்டு கணக்கு படி ஜூன் 30 வரை பணியாற்றலாம் என்று கூறுகின்றனர். அது தவறான கருத்து, பேராசிரியராக பணிபுரியும் நபர்களுக்கு தான் அது பொருந்தும். ஆனால் பதிவாளர் வகுப்புகள் எடுக்காமல் அலுவல் ரீதியான பணிகளை மட்டுமே கவனிப்பார், எனவே அவருக்கு அகடாமிக் ஆண்டு கணக்கில் வராது.

அதேபோல் நிதி அலுவலர், தேர்வுக் கட்டுப்பாட்டாளர், தொலைதூர கல்வி இயக்குநர் என பல்கலைக்கழகத்தின் முக்கிய அலுவலர்கள் அனைவரும் பணி காலம் முடிந்த பிறகும் பொறுப்பு அலுவலர்களாக இருக்கின்றனர். இதனால் பல்வேறு வளர்ச்சிப் பணிகள் பாதிக்கப்பட்டுள்ளது. எனவே பதிவாளரை உடனடியாக மாற்ற வேண்டும் என்று துணை வேந்தரிடம் மனு அளித்துள்ளோம் என்று கூறினார்.

சில நடைமுறை சிக்கல்களால் புதிய நியமனத்தில் தாமதம் ஏற்பட்டாலும் கூட இது போன்ற முக்கிய பல்கலைக்கழகத்தின் முக்கிய பதவிகளில் பொறுப்பு அலுவலர்களைப் பல மாதங்கள் நீட்டிக்கச் செய்வது என்பது பல்கலைக்கழகத்தின் வளர்ச்சிக்கு ஆபத்தானது என்பது கல்வியாளர்களின் கருத்தாக உள்ளது.