துப்பாக்கி சுடும் பயிற்சி- 500 மாணவர்கள் பங்கேற்பு

நெல்லை : பாளையங்கோட்டை தனியார் பள்ளி மைதானத்தில் நடைபெற்ற என்சிசி மாணவர்களுக்கு துப்பாக்கி சுடும் பயிற்சியில் 500க்கும் மேற்பட்ட மாணவர்கள் கலந்து கொண்டனர்.

நெல்லை மாவட்டம், பாளையங்கோட்டையில் உள்ள தனியார் பள்ளி மைதானத்தில் என்சிசி மாணவர்களுக்கு துப்பாக்கி சுடுதல் உள்ளிட்ட பல்வேறு பயிற்சிகள் நடைபெற்று வருகிறது. இந்த பயிற்சி முகாமில் மாவட்டத்தில் உள்ள சுமார் 50க்கும் மேற்பட்ட பள்ளிகளில் இருந்து 500க்கும் அதிகமான மாணவர்கள் கலந்துகொண்டு பயிற்சி பெற்று வருகின்றனர். கடந்த 20ஆம் தேதி தொடங்கிய இந்த பயிற்சி முகாம் வருகின்ற 29ஆம் தேதி வரை நடைபெறுகிறது.

இந்த பயிற்சியில் மாணவர்களுக்கு துப்பாக்கி சுடுதல், வெடி பொருட்களை கையாளுதல், தனி ஒழுக்கப் பயிற்சி என பல்வேறு பயிற்சிகள் வழங்கப்பட்டன. இந்த பயிற்சியினை என்சிசி கமாண்டர் தினேஷ் வழங்கினார். மேலும் இதில் சிறப்பாக செயல்படும் மாணவ - மாணவிகள் டெல்லியில் நடைபெறும் சிறப்பு பயிற்சிக்கு அனுப்பி வைக்கப்படுவார்கள் என கமாண்டர் தினேஷ் தெரிவித்தார்.