சாதி தான் இருக்கு.. பேருந்து இல்லை.. நாங்குநேரி மக்களின் 15 ஆண்டு தீராத்துயர்..!

Nanguneri people fighting for bus facility: ஊருக்குள் பேருந்து வந்து செல்ல 15 ஆண்டுகளாகப் போராடும் நாங்குநேரி மக்களின் பரிதவிப்பு குறித்து விவரிக்கிறது இந்த தொகுப்பு.

• " class="align-text-top noRightClick twitterSection" data="">

திருநெல்வேலி: நெல்லை மாவட்டத்தின் மூலையில் இருக்கும் நாங்குநேரி, இந்தியா முழுவதும் அறியப்பட மோசமான ஒரு காரணம் இருந்தது. கடந்த மாதத்தில் பள்ளியில் நடைபெற்ற சாதிரீதியான மோதலால் சக மாணவனை பள்ளி மாணவர்கள் அரிவாளால் வெட்டிய சம்பவம்தான் அது. சாதி நுழைந்து கோரத்தாண்டவம் ஆட எந்த தடையும் நாங்குநேரியில் இருக்கவில்லை. ஆனால் அடிப்படை தேவையான பேருந்து வசதி நாங்குநேரிக்குள் இல்லை என்பது யாருக்கும் எட்டாததுதான் அவல நகைச்சுவை.

திருநெல்வேலி நகரிலிருந்து சுமார் 30 கிலோ மீட்டர் தொலைவில் திருநெல்வேலி-கன்னியாகுமரி தேசிய நெடுஞ்சாலை ஓரம் அமைந்துள்ளது இந்த நாங்குநேரி. நாங்குநேரியை சுற்றி வள்ளியூர், திசையன்விளை, உவரி, பணகுடி போன்ற பிற நகரங்கள் உள்ளன ஆனால் இங்கிருந்து அண்டை நகரங்களுக்குச் சென்று வர போதிய பேருந்து வசதி இல்லாமல் கடந்த 15 ஆண்டுகளாக இப்பகுதி மக்கள் பரிதவித்து வருகின்றனர். இப்பகுதி தொழில் ரீதியான வளர்ச்சியை எட்ட முடியாமல் போவதற்கும் இதுதான் காரணம்.

திருநெல்வேலியில் இருந்து நாகர்கோவில், கன்னியாகுமரி போன்ற ஊர்களுக்குச் செல்லும் பேருந்துகள் நாங்குநேரி ஊருக்குள் வராமல் நெடுஞ்சாலை ஓரம் ஊருக்கு வெளியே பயணிகளை இறக்கி விட்டபடி செல்வதாக ஒரு குற்றச்சாட்டுத் தொடர்ச்சியாக உள்ளது. திருநெல்வேலி போக்குவரத்துக் கழகம் சார்பில் தற்போது திருநெல்வேலியில் இருந்து நாகர்கோவிலுக்கு இரு மார்க்கமாக 40க்கும் மேற்பட்ட 1 to 1 பேருந்துகளை இயக்கி வருகிறது. இந்த 1 to 1 பேருந்துகள் நாங்குநேரி ஊருக்குள் செல்வதில்லை. இது தவிர சாதாரண பேருந்துகளும் நாங்குநேரி ஊருக்குள் செல்லாமல் ஊருக்கு வெளியே பயணிகளை இறக்கி விடுகின்றனர்.

இதனால் பெண்கள், குழந்தைகள் போன்றோர் பாதுகாப்பின்றி சுமார் ஒரு கிமீ தூரம் நடந்து ஊருக்குள் செல்ல வேண்டியுள்ளது. இதைக் கண்டித்து நாங்குநேரி மக்கள் பல முறை போராட்டங்களையும் நடத்தியுள்ளனர். மேலும், நாங்குநேரி மக்கள் பலமுறை ஓட்டுநர்கள் மற்றும் நடத்துநர்களிடம் பேருந்தை வழிமறித்து வாக்குவாதம் செய்யும் சம்பவமும் வாடிக்கையாக நடைபெற்று வருகிறது.

சில பேருந்துகளில் வலுக்கட்டாயமாகப் பயணிகளை ஏற்றினாலும் கூட நாங்குநேரி செல்வதற்குக் கூடுதல் கட்டணம் வசூலிப்பதாகவும் அப்பகுதி மக்கள் தெரிவிக்கின்றனர் குறிப்பாக நாங்குநேரிக்கு டிக்கெட் கேட்டால் நாகர்கோவில் டிக்கெட் கட்டணத்தை வசூலித்து விட்டு நெடுஞ்சாலை ஓரம் அவர்களை இறக்கிவிட்டுச் செல்வதாகக் கூறப்படுகிறது.

இது குறித்து நாங்குநேரி மக்கள் கூறுகையில், "கடந்த 15 ஆண்டுகளாகப் பேருந்து வசதிக்காகப் போராடி வருகிறோம் நாங்குநேரியில் நாள்தோறும் சுமார் 12,000 மக்கள் வெளியே சென்று வருகின்றனர். ஆனால் போதிய பேருந்து வசதி இல்லாததால் இளைஞர்கள், பெண்கள், குழந்தைகள் என அனைவரும் பாதிக்கப்படுகின்றனர். பலமுறை அரசிடம் கோரிக்கை வைத்தும் அரசியல் ஆதாயங்களுக்காக அரசியல் தலைவர்களும் எங்களைப் புறக்கணிக்கின்றனர்" என்று வேதனை தெரிவித்தனர்.

இதுகுறித்து திருநெல்வேலி அரசுப் போக்குவரத்துக் கழக அதிகாரி ஒருவரிடம் கேட்டபோது, "நாங்குநேரி ஊருக்குள் சாதாரண பேருந்துகள் அனைத்தும் சென்று வருகிறது பொதுமக்கள் கூறுவதைப் போன்று ஓட்டுநர்கள் புறக்கணிப்பதில்லை நாங்குநேரி வழியாக திசையன்விளை உட்பட பிற நகரங்களுக்கும் பேருந்துகள் இயக்கப்படுகிறது 1 to 1 பேருந்தைப் பொறுத்தவரை அரசின் கொள்கை முடிவு அதில் நாங்கள் எதுவும் கூற முடியாது" என்று தெரிவித்தார்.

தேசிய நெடுஞ்சாலையில் இருந்து கீழே புறவழிச் சாலையில் இறங்கி ஒரு கிலோமீட்டர் தூரம் உள்ளே ஊருக்குள் சென்று பயணிகளை ஏற்றி, இறக்கி விட்டு மீண்டும் ஒரு கிலோமீட்டர் தூரம் பயணித்து தேசிய நெடுஞ்சாலையை அடைய நடத்துநர்கள் மற்றும் ஓட்டுநர்கள் சோம்பல் படுவதும் தெரிய வருகிறது. அதேபோல் வெறும் அரசியல் தலையீடு என்று சொல்வதை விட சாதி ரீதியான பல மோதல்களும் நாங்குநேரி போக்குவரத்து பிரச்சனைக்கு முக்கிய காரணமாக இருக்கிறது என்றே கூறப்படுகிறது.

இது குறித்து நாங்குநேரி தொகுதி சட்டமன்ற உறுப்பினர் எம்,எல்.ஏ ரூபி மனோகரனை தொலைப்பேசியில் தொடர் கொண்டபோது, "நாங்குநேரி பேருந்து பிரச்சனை தொடர்பாக எம்எல்ஏ என்ற முறையில் பல முறை அதிகாரிகளிடம் தெரிவித்து நடவடிக்கை எடுத்துள்ளேன் இதற்காக மக்கள் எனக்கு நன்றி கூறினர். மீண்டும் இந்த பிரச்சனை இருப்பதாக நீங்கள் கூறுவதன் மூலம் தான் எனக்குத் தெரிய வருகிறது. இதுகுறித்து விசாரித்து நடவடிக்கை எடுப்பேன்" என்று தெரிவித்தார்.

நாங்குநேரியில் சாதி மோதல் மட்டுமா பிரச்சனை என்று பார்க்கும் போது பேருந்து வசதி இல்லாமை முக்கிய பிரச்சனையாகப் பார்க்கப்படுகிறது. எனவே இனிவரும் காலங்களிலாவது நாங்குநேரியை மேம்படுத்த நடவடிக்கை எடுக்க வேண்டும் என்பது சமூக ஆர்வலர்களின் கோரிக்கையாக உள்ளது.

இதையும் படிங்க: சனாதனம் குறித்த கேள்விக்கு சிரித்துவிட்டு சென்ற அமைச்சர் தங்கம் தென்னரசு!