நாங்குநேரி சம்பவம்: அண்ணாமலையின் குற்றச்சாட்டுக்கு பதிலளித்த முன்னாள் சபாநாயகர்..!

நெல்லை மாவட்டம் நாங்குநேரியில் பள்ளி மாணவன் தாக்கப்பட்ட விவகாரத்தில் கைது செய்யப்பட்ட மாணவரின் தந்தை திமுக உறுப்பினர் என பாஜக மாநில தலைவர் அண்ணாமலையின் குற்றச்சாட்டுக்கு நெல்லை கிழக்கு மாவட்ட திமுக செயலாளர் ஆவுடையப்பன் பதில் அளித்துள்ளார்.

திருநெல்வேலி: நாங்குநேரியில் சாதிய மோதலால் 12ஆம் வகுப்பு படிக்கும் பட்டியலின பள்ளி மாணவன் ஒருவன், சக மாணவர்களால் தாக்கப்பட்ட சம்பவம் மக்களிடையே பெரும் அதிர்வலையை ஏற்படுத்தி உள்ளது. அம்மாணவனுக்கு பள்ளியில் வைத்து தொடர்ச்சியாக மாற்று சமூகத்தைச் சேர்ந்த சில மாணவர்கள் சாதிய ரீதியான பாகுபாடு காட்டியதாகவும் தெரியவந்துள்ளது.

இதனையடுத்து தாக்கப்பட்ட பட்டியலின மாணவரின் தாய் பள்ளியில் புகார் அளித்ததால் ஆத்திரமடைந்த சக மாணவர்கள், பட்டியலின மாணவனை ஆயுதத்தால் கொடூரமாக தாக்கியதும் தெரியவந்துள்ளது. இதனையடுத்து தமிழக முதல்வர் உள்பட பல அரசியல் கட்சித் தலைவர்கள் தொடர்ச்சியாக இந்த சம்பவத்திற்கு கண்டனம் தெரிவித்து வருகின்றனர்.

மேலும் அரசு சார்பில் அமைச்சர்கள், கட்சித் தலைவர்கள் பலர் நேரில் வந்து மாணவனின் குடும்பத்திற்கு ஆறுதல் தெரிவித்து வருகின்றனர். இந்நிலையில் இந்த விவகாரம் குறித்து அறிக்கை வெளியிட்ட பாஜக மாநில தலைவர் அண்ணாமலை, மாணவனை தாக்கிய சக மாணவர்களின் பெற்றோர் சிலர் திமுகவில் இருப்பதாக குறிப்பிட்டு இருந்தார்.