திருநெல்வேலி: தேனி மாவட்டம் கம்பத்தில் பொதுமக்களை அச்சுறுத்தி வந்த அரிக்கொம்பன் என்ற ஒற்றை காட்டு யானை மயக்க ஊசி செலுத்தி நேற்று (ஜூன் 5) பிடிக்கப்பட்டது. இந்த நிலையில், பிடிப்பட்ட அரிக்கொம்பன் யானையை நெல்லை மாவட்டம், களக்காடு முண்டந்துறை புலிகள் காப்பகத்துக்கு உட்பட்ட வனப்பகுதியில் விடுவதற்காக வனத் துறையினர் பலத்த பாதுகாப்புடன் நெல்லை அழைத்து வந்தனர்.
நெல்லை மாநகர வழியாக பிரதான சாலையில் லாரியில் ஏற்றி கொண்டு வரப்பட்ட அரிக்கொம்பன் யானை, மணிமுத்தாறு அணை அருகே உள்ள வன சோதனைச் சாவடி வழியாக காட்டுப் பகுதிக்குள் கொண்டு செல்லப்பட்டது. தொடர்ந்து, அங்கிருந்து மாஞ்சோலை அடுத்த கோதையாறு அணையின் மேல் பகுதியில் அரிக்கொம்பன் யானையை விடுவதற்காக அழைத்து வந்தனர். பின் அங்கே ஆள் நடமாட்டம் இல்லாத காட்டுப் பகுதிக்குள் யானை விடப்பட்டதாக கூறப்படுகிறது.
இதனிடையே, மிகவும் அச்சுறுத்தலாக உள்ள அரிக்கொம்பன் யானையை கொண்டு வருவதற்கு எதிர்ப்பு தெரிவித்து மணிமுத்தாறு பகுதி மக்கள் மணிமுத்தாறு வன சோதனைச் சாவடி அருகே போராட்டத்தில் ஈடுபடலாம் என்று தகவல் வெளியானதைத் தொடர்ந்து, துணை காவல் கண்காணிப்பாளர் தலைமையில் மணிமுத்தாறு சோதனைச் சாவடியில் காவல் துறையினர் குவிக்கப்பட்டனர்.
இந்த நிலையில், அரிக்கொம்பன் யானை பாதுகாப்பாக நெல்லை வந்து சேர்ந்தது. பின்னர், தாழையூத்து அருகே சாலையோரம் யானை கொண்டு வரப்பட்ட வாகனத்தை வனத் துறையினர் திடீரென நிறுத்தினர். அப்போது, யானை மீது தண்ணீர் பீய்ச்சி அடிக்கப்பட்டது. தொடர்ந்து, யானை பலத்த போலீஸ் பாதுகாப்புடன் மணிமுத்தாறு வனப் பகுதிக்குள் கொண்டு வரப்பட்டது.
கோதையாறு அணை அருகே அரிக்கொம்பன் யானைக்கு மருத்துவக் குழுவினர் சிகிச்சை அளிப்பதற்காக கம்பத்தில் இருந்து யானையுடன் அழைத்து வரப்பட்டிருந்தனர். இந்த நிலையில், யானை கொண்டு செல்லப்பட்ட மலைப் பாதையில் மின் வயர்கள் தாழ்வான பகுதியில் கிடப்பதால், முன்னெச்சரிக்கையாக நேற்று மாலை 5 மணி முதல் மாஞ்சோலை தேயிலைத் தோட்ட பகுதி, நாலுமுக்கு போன்ற பகுதிகளில் மின் விநியோகம் துண்டிக்கப்பட்டது.
இதனால் சுமார் மூன்று மணி நேரம் மின்சாரம் இல்லாமல் மாஞ்சோலை தேயிலை தோட்டத் தொழிலாளர்கள் கடும் அவதி அடைந்தனர். யானை மணிமுத்தாறு சோதனைச் சாவடியில் இருந்து மஞ்சோலையை கடந்த பிறகே அங்கு மீண்டும் மின்சாரம் வழங்கப்பட்டது. இதனால் அப்பகுதி மக்கள், தங்கள் அத்தியாவசியப் பணிகளை செய்ய முடியாமல் சிரமப்பட்டதாக கூறப்படுகிறது.
குறிப்பாக, இரவு நேரம் என்பதால் மின்சாரம் இல்லாமல் மாஞ்சோலை மலை கிராமங்கள் முழுவதும் இருளில் மூழ்கியது. ஏற்கனவே மாஞ்சோலை பகுதியில் வனவிலங்குகள் நடமாட்டம் அதிகரித்து வரும் நிலையில், மூன்று மணி நேரமாக மின்சாரம் துண்டிக்கப்பட்ட சம்பவம் அப்பகுதி மக்களிடையே அச்சத்தை ஏற்படுத்தியது.
இதையும் படிங்க: Arikomban: நெல்லை வனப்பகுதியில் அரிக்கொம்பன் யானையை விட பொதுமக்கள் எதிர்ப்பு..!
