நாங்குநேரி இடைத்தேர்தலில் புதிய தமிழகம் கட்சியின் தலைவர் கிருஷ்ணசாமி அதிமுகவிற்கு ஆதரவில்லை என தெரிவித்துள்ளார். எனினும், அதிமுகவின் பரப்புரை துண்டறிக்கையில் கிருஷ்ணசாமி படத்தைப் போட்டு அதிமுக வேட்பாளருக்கு ஆதரவு என பிரசாரம் செய்து வருகின்றனர். இது குறித்து புதிய தமிழகம் கட்சியினர் காவல் நிலையத்தில் நடவடிக்கை எடுக்கப் புகார் அளித்துள்ளனர்.
இந்நிலையில் அதிமுக அமைச்சர் வெல்ல மண்டி நடராஜன் அதிமுக தொண்டர்களுடன் நாங்குநேரி தொகுதிக்குட்பட்ட மூலைக்கரைபட்டி வருகை தந்தார். பொதுமக்களுக்கு அவர் அளித்த பிரசார துண்டறிக்கையில் புதிய தமிழகம் தலைவர் கிருஷ்ணசாமி படத்தைப் பயன்படுத்தி, அமைச்சர் வெல்லமண்டி நடராஜன் வாக்கு கேட்பதற்கு அப்பகுதி மக்கள், புதிய தமிழகம் ஒன்றிய செயலாளர் தளவாய் பாண்டியன் தலைமையில் எதிர்ப்பு தெரிவித்தனர். இதனால் அங்கு இரு கட்சியினருக்குமிடையே வாக்குவாதம் ஏற்பட்டது.
இது குறித்து தகவலறிந்த காவல்துறையினர் சமாதானப்படுத்த முயற்சித்தனர். இதையடுத்து அமைச்சர் வெல்லமண்டி நடராஜன், அதிமுகவினர் அவ்விடத்திலிருந்து வெளியேறினர்.
இதையும் படிங்க:நாங்குநேரி தொகுதியின் தற்போதைய நிலை என்ன?- ஓர் அலசல்!
