தேனி: தேனி மாவட்டம் பெரியகுளம் அருகே ஜெயமங்களம் காந்திநகர் பகுதியில் உள்ள மாரியம்மன் கோயில் திருவிழா கடந்த சில நாட்களுக்கு முன்னர் நடைபெற்றது. அப்போது காந்திநகர் பகுதியைச் சேர்ந்த இருளப்பன் என்ற இளைஞர், அருகே உள்ள சிந்துவம்பட்டி பகுதிக்குச் சென்றபோது, அதே சமுதாயத்தைச் சேர்ந்த சில இளைஞர்களிடையே வாக்குவாதம் ஏற்பட்டுள்ளது.
இதனையடுத்து இருளப்பனை, சிந்தும்பட்டி பகுதியைச் சேர்ந்தவர்கள் கடுமையாக தாக்கி கத்தியால் குத்தியதாக கூறப்படுகிறது. இதில் படுகாயாம் அடைந்த இருளப்பனை சிகிச்சைக்காக தேனி அரசு மருத்துவக் கல்லூரி மருத்துவமனைக்கு கொண்டு சென்றுள்ளனர். அங்கு பரிசோதித்த மருத்துவர்கள், அவர் இறந்து விட்டதாக தெரிவித்துள்ளனர்.
இதனையடுத்து, கொலை செய்த நபர்களை உடனடியாக கைது செய்யக் கோரி இருளப்பனின் உறவினர்கள், பெரியகுளம் சாலையில் மறியல் போராட்டத்தில் ஈடுபட்டனர். பின்னர் சம்பவம் அறிந்து அங்கு வந்த பெரியகுளம் காவல் துறை துணை கண்காணிப்பாளர் கீதா, போராட்டத்தில் ஈடுபட்டவர்களிடம் பேச்சுவார்த்தை நடத்திய போதும், தொடர்ந்து 4 மணி நேரமாக போராட்டத்தில் ஈடுபட்டனர்.
இதனால் பெரியகுளம் பகுதியில் இருந்து ஆண்டிபட்டி, குள்ளபுரம், தேவதானப்பட்டி, பொம்மிநாயக்கன்பட்டி உள்ளிட்ட கிராமங்களுக்குச் செல்லும் பேருந்து போக்குவரத்து நிறுத்தப்பட்டதால், பொதுமக்கள் கடும் அவதிக்குள்ளாயினர்.
இதனைத் தொடர்ந்து, அங்கு வந்த தேனி மாவட்ட காவல் துறை கண்காணிப்பாளர் டோங்ரே பிரவீன் உமேஷ், போராட்டத்தில் ஈடுபட்ட இருளப்பனின் உறவினர்களிடம் உரிய நடவடிக்கை எடுப்பதாகக் கூறியதைத் தொடர்ந்து, போராட்டத்தை கைவிட்டு கலைந்து சென்றனர்.
இதனைத் தொடர்ந்து, கோஷ்டி மோதலில் ஈடுபட்ட நபர்களைப் பிடிக்க தனிப்படை அமைக்கப்பட்டு விசாரனை நடைபெற்று வந்தது. இந்நிலையில், இளைஞரை கத்தியால் குத்தி கொலை செய்த முக்கிய நபர் மற்றும் இரண்டு பெண்கள் உள்பட 14 நபர்கள் கைது செய்யப்பட்டு, அவர்கள் மீது வழக்குப் பதிவு செய்யப்பட்டு, நீதிமன்றத்தில் ஆஜர்படுத்தி சிறையில் அடைக்கப்பட்டுள்ளனர்.
கைது செய்யபட்டவர்கள்: சிந்துவம்பட்டி கிராமத்தைச் சேர்ந்த கார்த்திக் ராஜா, முத்து, காமாட்சி, அபினேஷ் பாலா ஆகிய நான்கு முக்கிய நபர்கள், எருமலநாயக்கம்பட்டி, வத்தலகுண்டு பகுதியைச் சேர்ந்த இரண்டு இளைஞர்கள் மற்றும் இரண்டு பெண்கள் உள்பட 14 பேர் கைது செய்யப்பட்டுள்ளனர்.
இதையும் படிங்க: காசா நகர மருத்துவமனை மீது தாக்குதல்; 500க்கும் மேற்பட்டோர் உயிரிழப்பு - ஜோ பைடனின் ஜோர்டான் பயணம் தள்ளி வைப்பு!
