தேனி மாவட்டம், பெரியகுளம் அருகே உள்ள கைலாசப்பட்டி கிராமத்தில், ஒரு சமூகத்தைச் சேர்ந்த நபர்கள் கஞ்சா விற்று வருவதாக பெரியகுளம் தென்கரை காவல் நிலையத்தில் கடந்த இரண்டு மாதங்களுக்கு முன்பாக, அதே ஊரைச் சேர்ந்த மற்றொரு சமூகத்தைச் சேர்ந்தவர்கள் புகார் கொடுத்துள்ளனர். காவல் நிலையத்தில் கொடுக்கப்பட்ட புகார் கஞ்சா விற்பனையாளர்களுக்குத் தெரிய வரவே, புகார் கொடுத்த எதிர் சமூகத்தினரின் வீட்டை அடித்து நொறுக்கி ரகளையில் ஈடுபட்டுள்ளனர்.
இச்சம்பவம் தொடர்பாக சேதப்படுத்தப்பட்ட வீட்டைக்கொண்ட சமூகத்தைச் சேர்ந்தவர்கள் காவல் நிலையத்தில் புகார் கொடுத்தும் காவல் துறையினர் உரிய நடவடிக்கை எடுக்காததாகக் கூறப்படுகிறது. இந்நிலையில் சேதப்படுத்தப்பட்ட வீட்டைக்கொண்ட சமூகத்தைச் சேர்ந்தவர்கள் கஞ்சா விற்பனை செய்பவர்களின் மீது நடவடிக்கை எடுக்கக்கோரி, பெரியகுளம் தென்கரை காவல் நிலையத்தை சில நாட்களுக்கு முன்பு முற்றுகையிட்டு போராட்டத்தில் ஈடுபட்டுள்ளனர்.
இது தொடர்பாக, இரு தரப்பினருக்கும் இடையே அப்பகுதியில் அவ்வப்போது மோதல் இருந்து வந்ததுள்ளது. இந்நிலையில், நேற்று கைலாசப்பட்டி கிராமத்தைச் சேர்ந்த சிலர் பெரியகுளம் காவல் துறை துணைக் கண்காணிப்பாளர் ஆறுமுகத்தை அவரது அலுவலகத்தில் சந்தித்தனர்.
அங்கு, இரு சமூகத்தினரிடையே மோதல் ஏற்படும் சூழ்நிலை இருப்பதாகவும் காவல்துறையினர் தலையிட்டு உரிய பாதுகாப்பு வழங்க வேண்டும் என்றும் கோரிக்கை மனு கொடுத்தனர். ஆனால், காவல் துறையினர் இதை பெரிதாக எண்ணாமல் எவ்வித நடவடிக்கையும் எடுக்கவில்லை எனக் கூறப்படுகிறது.
அதனைத் தொடர்ந்து நேற்று மாலை இரு சமூகத்தைச் சேர்ந்தவர்களும் கம்பி, அரிவாள், உருட்டுக்கட்டை உள்ளிட்ட பயங்கர ஆயுதங்களால், ஒருவரை ஒருவர் தாக்கிக் கொண்டுள்ளனர். இதில் ஒரே சமூகத்தைச் சேர்ந்த ஒரு பெண் உட்பட 7 பேர் வெட்டு காயமடைந்துள்ளனர்.
இதில் பலத்த காயமடைந்த ஜெயபால் என்பவர் உயர் சிகிச்சைக்காக தேனி அரசு மருத்துவக்கல்லூரி மருத்துவமனைக்குக் கொண்டு செல்லப்பட்டு சிகிச்சைப் பலனின்றி உயிரிழந்தார்.
இதற்கிடையே மற்றொரு சமூகத்தைச் சேர்ந்த பெருமாள் (70), மோதல் காரணமாக பலியானதாகக் கூறி தேனி - திண்டுக்கல் சாலையில் இறந்தவரின் உடலை வைத்து, அவரின் உயிரிழப்பிற்குக் காரணமானவர்களை கைது செய்யக் கோரி, அவரது உறவினர்கள் தொடர்ந்து இரண்டு மணி நேரமாக சாலை மறியலில் ஈடுபட்டுள்ளனர். காவல் துறையினர் உரிய நடவடிக்கை எடுப்பதாக உறுதியளித்ததன் பேரில் அவர்கள் சாலை மறியலை கைவிட்டனர்.
மேலும், இரு பிரிவினரிடையே மோதல் ஏற்படாமல் இருக்க, மாவட்ட கண்காணிப்பாளர் சாய்சரண் தேஜஸ்வி, பெரியகுளம், தேனி, காவல் துறை துணைக் கண்காணிப்பாளர்கள் சம்பவ இடத்திற்கு விரைந்து வந்து பாதுகாப்புப்பணியில் ஈடுபட்டனர்.
தொடர்ந்து அப்பகுதியில் அசம்பாவிதம் எதுவும் நடைபெறாமல் இருக்க நூற்றுக்கும் மேற்பட்ட காவல் துறையினர் குவிக்கப்பட்டுள்ளனர். மோதல், தொடர்பாக நான்கு பேரைக் காவல் துறையினர் கைது செய்துள்ளனர். தொடர்ந்து அப்பகுதியில் பதற்றமான சூழந்நிலை நிலவி வருகிறது.
இதையும் படிங்க: சுவர் விளம்பர விவகாரம்: திமுக - அதிமுகவினர் இடையே மோதல்
