தேனி மாவட்டம் வீரபாண்டி அருகே உள்ள கிராமத்தைச் சேர்ந்த ரெங்கநாதன்(28), மேடை அலங்காரம் செய்யும் வேலை செய்துவருகிறார். இவர், அதே பகுதியைச் சேர்ந்த 17 வயது சிறுமியிடம் திருமணம் செய்து கொள்வதாக ஆசை வார்த்தை கூறி, அவரைப் பாலியல் வன்புணர்வு செய்துள்ளார்.
இந்நிலையில், ரெங்கநாதனுக்கு வேறொரு பெண்ணுடன் திருமண ஏற்பாடுகள் நடைபெற்றுவருவதை அறிந்த அச்சிறுமி, நேற்று தற்கொலை முயற்சியில் ஈடுபட்டுள்ளார். அதன்பின் பத்திரமாக மீட்கப்பட்ட சிறுமி, சின்னமனூர் அரசு மருத்துவமனையில் அனுமதிக்கப்பட்டு சிகிச்சையளிக்கப்பட்டுவருகிறது. இதுதொடர்பாக சிறுமியின் பெற்றோர் யாரும் புகார் அளிக்காத நிலையில், தகவலறிந்த வீரபாண்டி காவல் துறையினர் தாமாகவே முன்வந்து மருத்துவமனையில் இருந்த சிறுமியிடம், வாக்குமூலம் பெற்று விசாரணையை நடத்தினர்.
இதையடுத்து ரெங்கநாதன் மீது போக்சோ சட்டத்தின் கீழ் வழக்குப்பதிவு செய்து, அவரைக் கைதுசெய்து சிறையில் அடைத்தனர். பாதிக்கப்பட்ட சிறுமி மாவட்டக் குழந்தைகள் நலக்குழுத் தலைவர் சுரேஷ்குமார், உறுப்பினர்கள் நாகேந்திரன், பழனிச்சாமி ஆகியோர் முன்னிலையில் ஆஜர்படுத்தப்பட்டு, கொடுவிலார்பட்டியிலுள்ள சிறுமிகள் காப்பகத்தில் தங்கவைக்கப்பட்டார்.
இந்த வழக்கில் பெற்றோர் துணையின்றி, சிறுமியின் சார்பில் தேவையான விவரங்களைத் திரட்டி குற்றவாளி மீது நடவடிக்கை எடுத்து சிறப்பாகச் செயல்பட்ட வீரபாண்டி பெண் காவலர் தீபாவை மாவட்டக் குழந்தைகள் நலக்குழுவினர், மாவட்டக் காவல் கண்காணிப்பாளர் சாய்சரன் தேஜஸ்வி ஆகியோர் பாராட்டினர்.
இதையும் படிங்க: நீதி கிடைக்காததால் தற்கொலை செய்துகொண்ட பாலியல் வன்புணர்வுக்கு உள்ளான சிறுமி!
