தேனி மாவட்டத்தில் உலக பழங்குடியினர் தினத்தை முன்னிட்டு வனவேங்கைகள் கட்சி சார்பில் பழங்குடிகள் எழுச்சி மாநாடு நடைபெற்றது. இதில் நாம் தமிழர் கட்சியின் தலைமை ஒருங்கிணைப்பாளர் சீமான் சிறப்பு விருந்தினராக பங்கேற்றார். அப்போது பேசிய அவர், கல் தோன்றி, மண் தோன்றா காலத்திற்கு முன் தோன்றிய மூத்த குடி குறவர் இனம். இதனை நரிக்குறவர் இனத்தோடு ஒப்பிட்டுப் பார்ப்பது தவறு எனக் குறிப்பிட்டார். மகாராஷ்டிராவிலிருந்து வந்த சரபோஜி மன்னருடன் வந்தவர்கள்தான் தற்போதைய நரிக்குறவர் இனத்தவர்கள் என்றும் தெரிவித்தார்.
ஊசி, பாசி மணி விற்பவர்களை, பூனை, நரி பிடித்துக் கொண்டு இருந்தவர்களை நரிக்குறவர் என்ற பட்டியலில் இணைத்து நாசம் செய்தது திமுக, அதிமுக ஆகிய திராவிட கட்சிகள்தான் என கடுமையாக தாக்கிப் பேசினார். இவர்களையும் (திராவிட கட்சிகள்) அந்தப் பட்டியலில் சேர்க்க வேண்டிய பொறுப்பும், கடமையும் நமக்கு இருக்கிறது என்று கடுமையாக விமர்சித்துப் பேசினார்.
குடிபோதையில் சீமானுக்கு முத்தம் தரவந்த இளைஞரால் சலசலப்பு
இதனிடையே கூட்டத்தில் சீமான் பேசிக்கொண்டிருக்கையில், மேடை ஏறிய இளைஞர் ஒருவர் தனது கைகளால் சீமானின் முகத்தை பிடித்து முத்தம் கொடுக்க முயற்சித்தார். அதற்குள் சுதாரித்துக்கொண்ட சீமான் சற்று விலகிச் சென்று, குடித்துவிட்டு வருகிறான் பார்த்துக் கொண்டிருக்கிறீர்கள் என்று மேடையில் நின்றிருந்தவர்களை கடிந்துகொண்டார்.
அந்த இளைஞரை மேடையை விட்டு அழைத்துச் சென்ற பிறகு, 'அவர் நம் தம்பிதான்; அவராக வரவில்லை. அவருக்குள் இருக்கும் கரண்டுதான் வந்திருக்கிறது' என சீமான் நகைச்சுவையாக பேசியது அங்கிருந்தவர்கள் மத்தியில் கலகலப்பை ஏற்படுத்தியது.
