மலைகள் சூழ்ந்த மாவட்டமான தேனியில், மேகமலை அருகே அமைந்துள்ளது சின்னமனூர் நகர். இந்த நகருக்குள் மலைகளில் உள்ள குரங்குகள் உணவு தேடி வருவது வழக்கம். அவ்வாறு உணவு தேடிவந்த குரங்குக் கூட்டமொன்று நிரந்தரமாக அங்கேயே தங்கி மக்களை படாதபாடு படுத்திவருகிறது. சின்னமனூர் பேருந்து நிலையம் அருகே பழக்கடை வைத்திருப்பவர்கள் குரங்குகள் செய்யும் அட்டகாசத்தை தாங்கிக் கொள்ளாமல் சொல்ல முடியாத துயரத்தில் ஆழ்ந்துள்ளனர்.
இது குறித்து அப்பகுதியினர் கூறுகையில், கடைகளுக்கு அருகிலிருக்கும் தோட்டத்திலிருந்து அதிகாலையில் கிளம்பும் குரங்கு கூட்டம் நேராக தாங்கள் வைத்திருக்கும் பழக்கடைக்கு வந்துவிடுகின்றன. பின்னர் அங்குள்ள காய்கறி, பழங்கள் உள்ளிட்டவற்றை சேதப்படுத்திவிட்டு மாலையில் மீண்டும் தோட்டங்களுக்குள் சென்று குரங்குகள் மறைந்து விடுகின்றன. இதனை தடுக்கவும் முடியவில்லை, கட்டுப்படுத்தவும் இயலவில்லை என அவர்கள் புலம்பித் தவிக்கின்றனர்.
வாழை, தென்னை விவசாயிகள், பழ வியாபாரிகள், ஆட்டோ ஓட்டுநர்கள், பாதசாரிகள் என அனைவரும் குரங்குகளின் அட்டகாசங்களை சகித்துக்கொள்ள முடியாமல் திணறிவருகின்றனர். உணவுப் பொருட்கள் விற்பவர்களின் கதறல் ஒருபுறம் என்றால், ஜவுளிக் கடைக்குச் சென்று துணிகளை எடுத்துக்கொண்டு ஓடி விடுவது, சலூன் கடைகளுக்கும் சென்று சில நிமிடங்களில் அட்டகாசம் செய்து உயிர் பயத்தை காட்டுவது என குரங்குகளின் குற்றச்சாட்டுகளை அடுக்குகின்றனர் மற்றொரு தரப்பினர்.
இது தொடர்பாக அப்பகுதி வனத்துறை அலுவலர்களிடம் கேட்டபோது, குரங்குகளை ஒரு முறை பிடித்து வனத்திற்குள் விட்டோம். ஆனால் அவை மீண்டும் வந்து விட்டன என்றனர். மேலும், உணவுக்காகவே குரங்குகள் நகருக்குள் வருகின்றன. விரைவில் அவற்றை பிடித்து வனப்பகுதிக்குள் விடுவதற்கு நடவடிக்கை எடுக்கப்படும் என்று தெரிவித்தனர்.
குழந்தைகள், முதியோர், வியாபாரிகள் என அனைவரிடமும் அட்டகாசம் செய்துவரும் குரங்குகளை பிடித்து வனப்பகுதியில் நிரந்தரமாக விடுமாறும், தங்களின் வாழ்வாதாரங்கள் மேலும் பாதிக்கப்படாமல் இருக்க அலுவலர்கள் முயற்சி எடுக்க வேண்டும் என்பதே அப்பகுதி மக்களின் எதிர்பார்ப்பாக உள்ளது.
இதையும் படிங்க:இரும்பு கடையில் தீ விபத்து- ரூ.10 லட்சம் மதிப்புள்ள பொருட்கள் எரிந்து சேதம்
